KLAR FOR LANSERING: Anders Bakke (t.h.) gir ut eit nytt minialbum. Albumet er eit samarbeid med ei rekkje lokale tysnesingar. Her frå innspelinga. F.v. Eirik, Endre, Vidar og Tore Hodneland. (Foto: Havnelageret Studio)
KLAR FOR LANSERING: Anders Bakke (t.h.) gir ut eit nytt minialbum. Albumet er eit samarbeid med ei rekkje lokale tysnesingar. Her frå innspelinga. F.v. Eirik, Endre, Vidar og Tore Hodneland. (Foto: Havnelageret Studio)

Tysnespatriot Anders Bakke gir ut nytt digitalt minialbum

Anders Bakke har med seg ei rekkje lokale songarar og musikarar på det nye minialbumet som han gir ut i desse dagar.
Publisert 14.12.2019 kl. 14.00.

– Motivasjonen er å bruka lokale krefter på Tysnes. Dei er så utruleg gode og det er kjempegøy å bruka dei, seier ein godt nøgd Anders Bakke til «Tysnes».

Han har nyss vore i studio i Bergen og fått spelt inn eit heilt nytt minialbum, som denne veka er sleppt på plattformer som Spotify, Tidal og YouTube.

Albumet er sett saman av seks låtar, der så å seia alle musikarane som deltek har tilknyting til Tysnes. Familien Hodneland står for grunnkompet; Endre på piano, Vidar på trommer, Tore på gitar og Eirik på gitar og bass.


Duett med Monica

Tittelsporet på det nye albumet har han kalla «Vennskap». Det er ein duett der Anders syng saman med Monica Hoff Utne.

Albumet inneheld også «Malkenessongen», der nærast «heile» Malkenes syng med på refrenget. Dette er eit festopptak som blei gjort i «Hansaløo» til Oddvar Lunde. Jan Inge Høgestøl er lydmann på denne.

Ein annan av låtane på albumet er «Eventyrland». Det er ein song som blei laga til Karianne Dalland Nesse sin barnefestival Mini Surhaa Blues i 2018. På denne låten er Ingvild Vermedal, Angelica Nesse Dalland, Milena Titoka og Stig Heine Johansen med og korar. Stig Heine Johansen syng også korvokal på fleire av dei andre låtane.

Produsent for heile albumet er Daniel Birkeland, og masteringa står Kjell Birkeland for. Innspelinga er gjort i Havnelageret Studio i Bergen.


Er låtskrivar sjølv

Alle melodiar og tekstar er det Anders sjølv som har skrive, med unnatak av ein av låtane. «Lengt» er ein gamal tekst skriven av Jens Tvedt.

– Eg er veldig takknemleg for å få lov til å skapa musikk saman med så mange hyggjelege og fantastisk dyktige musikarar. Dette er heimelaga og kortreist musikk laga saman med gode vener, seier Anders.

– Tittelsporet er ein hyllest til vennskapet, det viktigaste og beste livet har å by på, legg han til.

Sjølv om Anders bur i Bergen, er han tysnespatriot på sin hals.

Tysnes er ein viktig del av dette prosjektet også. Han er oppteken av å bruka lokale krefter.


– Målet er ein CD

Anders har eit mål om å laga ei fullverdig plate. Men det må bli ein gong i framtida.

– Kanskje blir det ein ny CD om nokre år, eller kanskje ein vinyl, filosoferer han.

Han konstaterer at det er arbeidskrevjande å laga ein heil CD som må innehalda ti-tolv låtar.

– Arbeidsmessig er det enklare å laga fem-seks låtar i studio ei helg. Når det er mange som skal delta i prosjektet, er det mykje som skal passa og koordinerast, forklarar han.

Økonomisk er det heller ikkje så lukrativt med CD-produksjon. Salet har gått sterkt tilbake dei seinare åra. Det er mange som ikkje har CD-spelar lenger.

– På nettet blir låtane liggjande til evig tid. Folk kan spela dei når som helst. Det er motiverande, seier han.

Men det blir ikkje den store økonomiske gevinsten av det. For tusen avspelingar får han det same som for sal av ein CD.

– Det er langt fram til Kygo, smiler han.

– Men det er ein motivasjon at nokon faktisk høyrer på det, legg han til.


Siste saker Gå til framsida

Dømt for ruskøyring

Ei kvinne frå Trøndelag er i Sunnhordland tingrett dømt for å ha køyrt i rusa tilstand på Tysnes. Hendinga fann stad hausten 2018.Kvinna var tiltalt for å ha køyrt bil med ein alkoholkonsentrasjon i blodet på minst 2,08 promille. Ho erkjente seg ikkje skuldig etter tiltaleavgjerda.Eit av punkta som vart drøfta i retten var kor høg promille kvinna faktisk hadde då ho køyrde, og...

Frå barnehage til militæret

Sjurd Sandvik Pedersen hadde eit halvt års ventetid mellom vidaregåande og militæret. Det enda med vikarjobb i Lunde barnehage.