UNGT TALENT: Selma Nikolaisen speler ei mor til vandringsfolket i framsyninga «Lucia». (Foto: Svein Olav B. Langåker)
UNGT TALENT: Selma Nikolaisen speler ei mor til vandringsfolket i framsyninga «Lucia». (Foto: Svein Olav B. Langåker)

Selma (10) frå Tysnes spelte teater for over 2.000 på Stord

Selma Nikolaisen er så glad i å spela teater at ho pendlar til Stord for å spela teater. I helga spelte ho for over 2.000 publikummarar.
Publisert 16.12.2019 kl. 12.35. Oppdatert 17.12.2019 kl. 08.31.

Selma Nikolaisen frå Våge er den einaste frå Tysnes som er med på storoppsetjinga «Lucia» til Spinae Company på Stord. Kring 200 born, unge og vaksne er med som dansarar og skodespelarar i framsyninga, som er laga av Magdalena From Delis. Ho er leiar for Spinae Company og har laga manus, er kunstnerisk leiar og produsent.

Torsdag var det premiere etter ein intens øvingsperiode.

– Det var gøy, men også ganske stressande, fortel Selma Nikolaisen.


Teaterpendlar

Dei siste to vekene har ho reist til Stord kvar dag. Då blir det mykje køyring.

– Det går greitt å ta ferja og reisa, seier Selma Nikolaisen.

Mora hennar, Betsy Nikolaisen, vedgår at det blir mykje køyring.

– Men det er verdt det når eg ser kor ho kosar seg, og kor mykje det betyr for ho, seier ho.

– Eg har fått meg veldig mange venner, seier den unge skodespelaren.


– Gøy å få kjefta

Selma Nikolaisen spelte i Olavsgildet i sommar, og hadde ei av hovudrollene i musikalen til Uggdal skule i fjor. No i haust byrja ho i teatergruppa til Spinae Company på Stord.

– Me har ikkje teater på Tysnes, og så hadde eg lyst til å bli kjent med nye folk og spela teater, fortel ho når ho blir spurd om kvifor ho byrja.

– Kva er det som er så gøy å spela teater?

– Alt er gøy med teater! For eksempel så kan eg få kjefta på folk. Det er ganske gøy, ler ho. I rolla speler ho ei mor til vandringsfolket, og då får ho høve til å kjefta på ein av vennane sine.

– Korleis går det å hugsa replikkane dine, då?

– Det går greitt. Eg er litt god til å hugsa, og så har eg øvd nesten heilt sidan eg byrja i haust.

Den siste veka har ho spelt seks framsyningar av «Lucia», fleire gonger med over 400 i salen.

– Blir du nervøs når det er så mange folk som ser på deg?

– Nei. Det er det same om det er folk i salen, eller ikkje. Eg gløymer at det er folk der, seier den unge skodespelaren frå Våge.


Siste saker Gå til framsida

Rentekutt frå 8. april

Tysnes Sparebank set ned renta på utlån med inntil 0,6 prosentpoeng. For eksisterande kundar gjeld ny rente frå 8. april 2020.

Lesarinnlegg angåande dette koronaviruset

Synest det blir i mestelaget med «skremselspropaganda» no for tida. Eg er så gamal at eg hugsar kor klok den gamle kyrkjebøna var: «Fri oss frå pest og hunger. Gje oss godt og tenleg vêr. Fri oss frå ein vond og brå død. Vêr hos dei som strir med døden. Men så fann dei på at me behøvde ikkje be om det, for penicillinet var kome, og den drepte alle bakteriar. Ja, straks etter dei forandra på...