JULEFEST: Kjende julesongar som "Her kommer dine arme små" og "Du grønne, glitrande tre god dag" ljomar frå juletregangen i Lunde bedehus fredag kveld.
JULEFEST: Kjende julesongar som "Her kommer dine arme små" og "Du grønne, glitrande tre god dag" ljomar frå juletregangen i Lunde bedehus fredag kveld.

Samla fullt hus til tradisjonsrik juletrefest

Frå kjellaren i Lunde bedehus luktar det kakao og bollar. Frå salen tonar kjende julesongar.
Publisert 29.12.2019 kl. 14.22.

Det er fredagskveld i romjula og tid for juletrefest. Folk frå både Lunde og fleire andre bygder i Tysnes har teke turen til bedehuset ved Lundeelva.

Det er leiar i bedehuslaget, Marit Humlevik, som ynskjer velkomen, før «Glade jul» fyller salen med songstemmer frå både born og vaksne med tonefølgje av Synnøve Hodneland på piano.

På programmet står både song, juleevangeliet, andakt, mat, juletregang, nissebesøk og meir juletregang.


Unge songstemmer

Eldbjørg Knudsen har med seg ein flokk med unge songarar, nokre frå barnekoret og nokre frå Soul Children. Dei framfører mellom anna «Tenn Et Lite Lys» og «Gud du elsker meg og tar meg som jeg er».

– Det er ikkje så lett å samla 25 frå barnekoret i romjula, så eg har med meg nokre frå begge kora, fortel korleiar Eldbjørg.

Unge Herman Lunde Klemmetsby (9) har teke på seg oppgåva med å lesa juleevangeliet. Den oppgåva klarar han godt. Han les både klårt og tydeleg.

– Det gjekk fint. Kjekt var det og, røpar han til «Tysnes» etterpå.

Wenche Brandsæter held andakta. Ho snakkar om familie, vener og bestevenen Jesus. Etter andakta tonar «Jeg er så glad hver julekveld» i heile bedehuset.


Populært med nissebesøk

Etter ei god matøkt med bollar og kakao i kjellaren, er det tid for juletregang, med god oppslutnad frå både små og store. Den eine kjende julesongen etter den andre ljomar utover i lokalet.

Ekstra populært er det då nissen kjem stigande inn i lokalet, med ein stor sekk på ryggen som er full av gåver til dei yngste. Og så held juletrefest fram, med fleire julesongar og meir gang rundt juletreet.

Leiar i bedehuslaget, Marit Humlevik, gler seg over den gode oppslutnaden.

– Det plar alltid vera mellom 70 og 100 personar på desse festane. Det er me veldig godt nøgde med, seier ho.

– Det er få juletrefestar att i Tysnes. Det er ein viktig kulturtradisjonen me fører vidare her, seier ho, med eit lite hint til politikarane i Tysnes som har vedteke å kutta ut kulturstøtta til bedehuslaget.





BORN OG VAKSNE: Både unge og eldre julefestdeltakarar deltok i juletregangen.
BORN OG VAKSNE: Både unge og eldre julefestdeltakarar deltok i juletregangen.
UNG BIDRAGSYTAR: Herman Lunde Klemmetsby (9) les juleevangeliet.
UNG BIDRAGSYTAR: Herman Lunde Klemmetsby (9) les juleevangeliet.
KORSONG: F.v. Anette Christensen, Julie Aarvik, Ann Kristin Misje, Isabell Kripaityte-Nordbustad og Jeanette Sofia Misje. Framme f.v. Evelin Vevatne Tønnessen, Lilly Hustad og Ylva Dalland Helland. T.h. korleiar Eldbjørg Knudsen.
KORSONG: F.v. Anette Christensen, Julie Aarvik, Ann Kristin Misje, Isabell Kripaityte-Nordbustad og Jeanette Sofia Misje. Framme f.v. Evelin Vevatne Tønnessen, Lilly Hustad og Ylva Dalland Helland. T.h. korleiar Eldbjørg Knudsen.
POPULÆRT BESØK: Evelin Vevatne Tønnesse har fått gåve av nissen, medan Filip Godø Kjøndal (2) er klar, med mamma Aina Kjøndal bak.
POPULÆRT BESØK: Evelin Vevatne Tønnesse har fått gåve av nissen, medan Filip Godø Kjøndal (2) er klar, med mamma Aina Kjøndal bak.
NØGD: Jonas Bakke (snart 4) smiler nøgd med godtepose frå nissen.
NØGD: Jonas Bakke (snart 4) smiler nøgd med godtepose frå nissen.
PÅ JULEFEST: F.v. Marie Haugland, Aurora Fjeldet Sunde og Hedvig Lunde Klemmetsby får ein liten prat med nissen, og eit fotosmil.
PÅ JULEFEST: F.v. Marie Haugland, Aurora Fjeldet Sunde og Hedvig Lunde Klemmetsby får ein liten prat med nissen, og eit fotosmil.

Siste saker Gå til framsida

Dømt for ruskøyring

Ei kvinne frå Trøndelag er i Sunnhordland tingrett dømt for å ha køyrt i rusa tilstand på Tysnes. Hendinga fann stad hausten 2018.Kvinna var tiltalt for å ha køyrt bil med ein alkoholkonsentrasjon i blodet på minst 2,08 promille. Ho erkjente seg ikkje skuldig etter tiltaleavgjerda.Eit av punkta som vart drøfta i retten var kor høg promille kvinna faktisk hadde då ho køyrde, og...

Frå barnehage til militæret

Sjurd Sandvik Pedersen hadde eit halvt års ventetid mellom vidaregåande og militæret. Det enda med vikarjobb i Lunde barnehage.