FYRSTE AVGANG: «Kommandøren» til kai i Våge, klar for fyrste ordinære avgang frå Våge til Halhjem. (Foto: Camilla Korsnes)
FYRSTE AVGANG: «Kommandøren» til kai i Våge, klar for fyrste ordinære avgang frå Våge til Halhjem. (Foto: Camilla Korsnes)

Hadde fyrste avgangen på nyttårsaftan

Nyeferja MF «Kommandøren» er på plass på Våge-Halhjem. Klokka 12.10 på nyttårsaftan gjekk fyrste turen frå Våge.
Publisert 31.12.2019 kl. 14.49. Oppdatert 01.01.2020 kl. 10.48.

– Det verkar som ein stødig og god båt, seier kaptein Torbjørn Skår frå kapteinstolen i styrehuset høgt oppe på ferja.

Han har ansvaret om bord når «Kommandøren» går den fyrste ordinære turen på Våge-Halhjem på nyttårsaftan. Med seg på same skiftet har han overstyrmann Roar Hagen, maskinsjef Hogne Røssland og matros Eirik Wilhelmsen.

Med på turen er også tre av mannskapet som skal gå det andre skiftet; kaptein Roger Risøy frå Halhjem, overstyrmann Jonny Bergesen og matros Charleen Flatråker.

– Me er med for å gjera oss kjende med ferja og ruta, seier Roger Risøy. Mannskapet på skiftet hans gjekk av vakt på «Selbjørnsfjord» klokka 09.30.

Torbjørn og Roger skal byta på å vera kaptein annankvar dag i tre veker. Etter det tek skift nummer tre og skift fire over.


Frå Uggdal til Våge

«Tysnes» fekk vera med på ein historisk tur med «Kommandøren». Kanskje det einaste ferjeturen i soga mellom Uggdal og Våge. «Kommandøren» har dei siste vekene lagt ved industrikaien på Heningen for klargjering til å bli sett inn i ordinær rute. Offisielt skal Fjord1 ta over drifta på Våge-Halhjem frå 1. jaunar, men skiftet blei gjort på nyttårsaftan i samband med mannskapsskifte. Etter bytet i Våge la MF «Selbjørnsfjord» turen nordover, mot Trondheim.

I tolv knops fart seglar me frå Uggdal mot Våge. Veret er stille, og sjøen er nærast blikkstille. Så langt har dei nye mannskapa ikkje fått testa nyeferja i dårleg ver. Men ferja har allereie vore i drift i nesten eitt år i indre Sogn, på sambandet Mannheller-Fodnes. Det har gått fint. I november var mannskapa på femdagars opplæring i Sogn.

– Typenamnet på ferja er Zerocat 120, forklarar kapteinen.

Skroget er i aluminium, og bygd på Fjellstrand i Oma.

– Sericefarten i ordinær rute vil bli om lag 13 knop, litt kjappare enn med «Selbjørnsfjord», informerer kapteinen.

Når ladestasjonane i Våge og på Halhjem er på plass, vil ein rekna 35 minutt overfartstid og ti minutt til lading, totalt 45 minutt pr overfart.

– Normalt har me ei grunnbemanning på fire på «Kommandøren», i tillegg til ein dagmann, forklarar kapteinen, i det han styrer ferja ut frå kaien på Heningen.

Mannskapet på fire er ein person mindre enn på «Selbjørnsfjord». Stillinga som motormann er teken bort på «Kommandøren».


– Kjempebra arbeidsplass

Overstyrmann Jonny Bergesen gler seg til å jobba på nyeferja.

– Dette blir veldig bra. Det er kjekt med ny båt, seier han.

Han skryter av arbeidsplassen.

– Det er veldig fine skiftordningar når me bur på Tysnes, seier han.

Maskinsjef Hogne Røssland trivst også godt på ferja.

– Det er fint å ha arbeidsplassen sin her når ein har familie på Tysnes, seier Hogne, som tidlegare har mange års fartstid i utanriksfart.

Han synest «Kommandøren» er ei fin ferje.

– Når ladinga kjem på plass, trur eg dette blir veldig bra, legg han til.


Skal scanna bilskilta

Frå nyttår trer den nye betalingsordninga i kraft, passasjerar skal gå gratis og bilistane må betala meir.

Matrosane Eirik Wilhelmsen og Charleen Flatråker har som si arbeidsoppgåve å scanna bilskilta på alle bilane som skal reisa med ferja.

– Det er funne opp ein ny app som me skal bruka når me scannar skilta. På sekundar får me opp om bilen er registrert i Autopass-systemet, forklarar dei.

Fortrinnsvis vil dei registrera bilskilta i det bilane køyrer om bord.

Dei to skryter også over arbeidsplassen sin.

– Det er eit fantastisk samband å jobba på, med 35 minuttars overgang, seier Eirik.

Han er også godt nøgd med turnusordninga, med eitt døger på og eitt døger av i tre veker, og deretter tre veker fri.

– Det er difor eg likar ferjejobben, seier han med glimt i auga.

– Ja, det er ein veldig fin arbeidsplass, med masse kjekke folk og veldig kjekke passasjerar, skryter Charleen.


Litt vemodig

Dei er også godt nøgde med at det er salong oppe på nyeferja. Salongane er lyse og fine, med god utsikt.

For matrosane er det også ein fordel at alt er på eitt dekk når dei skal stua bilar.

– Det er alltid kjekt med det som er nytt, men me var veldig godt nøgde med «Selbjørnsfjord» også. Det er litt vemodig at det er slutt på FosenNamsos. Dei har vore ein utruleg god arbeidsgjevar, men me håpar det er like bra i Fjord1, seier dei, og gjer seg klare til å leggja til kai i Våge, til den fyrste ordinære turen med MF «Kommandøren».






KAPTEIN: Torbjørn Skår (nærast) er kaptein på den fyrste ordinære turen til «Kommandøren». T.v. overstyrmann Roar Hagen. (Foto: Ole Skaten)
KAPTEIN: Torbjørn Skår (nærast) er kaptein på den fyrste ordinære turen til «Kommandøren». T.v. overstyrmann Roar Hagen. (Foto: Ole Skaten)
SKIFT 2: Roger Risøy (t.v.) og Jonny Bergesen er kaptein og overstyrmann på skift to. (Foto: Ole Skaten)
SKIFT 2: Roger Risøy (t.v.) og Jonny Bergesen er kaptein og overstyrmann på skift to. (Foto: Ole Skaten)
MASKINSJEF: Hogne Røssland trivst som maskinsjef på Våge-Halhjem-ferja. (Foto: Ole Skaten)
MASKINSJEF: Hogne Røssland trivst som maskinsjef på Våge-Halhjem-ferja. (Foto: Ole Skaten)
MATROSAR: Charleen Flatråker og Eirik Wilhelmsen blir matrosar på skift to og skift ein, og skal scanna bilskilta på bilane. (Foto: Ole Skaten)
MATROSAR: Charleen Flatråker og Eirik Wilhelmsen blir matrosar på skift to og skift ein, og skal scanna bilskilta på bilane. (Foto: Ole Skaten)
GOD UTSIKT: Med salongar oppe på nyeferja, vil passasjerane få god utsikt over fjorden. (Foto: Ole Skaten)
GOD UTSIKT: Med salongar oppe på nyeferja, vil passasjerane få god utsikt over fjorden. (Foto: Ole Skaten)
FEKK BLOMAR: Bjørn Harald Austefjord frå Lygrepollen var den fyrste bilføraren som køyrde om bord i «Kommandøren» frå Våge. Han blei heidra med blomehelsing av Fjord1 og Eirik Wilhelmsen. (Foto: Ole Skaten)
FEKK BLOMAR: Bjørn Harald Austefjord frå Lygrepollen var den fyrste bilføraren som køyrde om bord i «Kommandøren» frå Våge. Han blei heidra med blomehelsing av Fjord1 og Eirik Wilhelmsen. (Foto: Ole Skaten)
SISTE TUREN: Dei siste bilane køyrer i land frå MF «Selbjørnsfjord» i Våge, før ferja legg turen nordover mot Trondheim. (Foto: Camilla Korsnes)
SISTE TUREN: Dei siste bilane køyrer i land frå MF «Selbjørnsfjord» i Våge, før ferja legg turen nordover mot Trondheim. (Foto: Camilla Korsnes)
KLAR FOR OPPDRAG: «Kommandøren» ligg klar utanfor ferjekaien i Våge, til å ta over etter «Selbjørnsfjord». (Foto: Camilla Korsnes)
KLAR FOR OPPDRAG: «Kommandøren» ligg klar utanfor ferjekaien i Våge, til å ta over etter «Selbjørnsfjord». (Foto: Camilla Korsnes)
FERJEBYTE: «Selbjørnsfjord» (nærast) på den siste turen, «Kommandøren» klar for den fyrste turen. (Foto: Camilla Korsnes)
FERJEBYTE: «Selbjørnsfjord» (nærast) på den siste turen, «Kommandøren» klar for den fyrste turen. (Foto: Camilla Korsnes)

Siste saker Gå til framsida

Dømt for ruskøyring

Ei kvinne frå Trøndelag er i Sunnhordland tingrett dømt for å ha køyrt i rusa tilstand på Tysnes. Hendinga fann stad hausten 2018.Kvinna var tiltalt for å ha køyrt bil med ein alkoholkonsentrasjon i blodet på minst 2,08 promille. Ho erkjente seg ikkje skuldig etter tiltaleavgjerda.Eit av punkta som vart drøfta i retten var kor høg promille kvinna faktisk hadde då ho køyrde, og...

Frå barnehage til militæret

Sjurd Sandvik Pedersen hadde eit halvt års ventetid mellom vidaregåande og militæret. Det enda med vikarjobb i Lunde barnehage.