ÅRETS SPÅMANN: Med 26 av 30 riktige svar gjekk Olav Skjellevik heilt til topps i spåmannskonkurransen for 2019. (Arkivfoto)
ÅRETS SPÅMANN: Med 26 av 30 riktige svar gjekk Olav Skjellevik heilt til topps i spåmannskonkurransen for 2019. (Arkivfoto)

– Ingen kan sjå inn i framtida utan å vita fortida

Med 26 av 30 riktige svar var Olav Skjellevik den desidert beste spåmannen i 2019.
Publisert 09.01.2020 kl. 15.00.

– Dette var valdsamt overraskande, fortel Olav Skjellevik då han får vita at han er Årets spåmann 2019.

Han spådde best av alle i fjor, og blei dermed den soleklare vinnaren av konkurransen.

– Eg ante ikkje at eg var så god til å spå, seier han nøgd.

Åleine på topp

Av 30 spåmannspørsmål trefte Olav blink på 26 stykk. Det gjorde at han ikkje berre hamna øvst på lista, men at han også vann soleklart. Nummer to i konkurransen blei Robert Grønvoll, som «berre» hadde 23 riktige svar. Tredjeplassen blei delt mellom Fredrik Hansen, Arve Belt, Randi Kleppe, Stine Gjersvik, Torbjørn Onarheim og Eva Økland, som alle hadde 22 riktige.

I tillegg til å kunna krona seg som den beste spåmannen på Tysnes, vinn Olav også ti Flaxlodd.

– Me får sjå om eg har like mykje flaks på lodda, fortel han.


Berre fire feil

Fasiten for 2019 viser 19 nei-svar og elleve ja-svar. Olav trefte på dei fleste nei-svara sine, men var litt for optimistisk på enkelte spørsmål. Han hadde trua både på at det blei peparkakeby i Lunde i 2019, at Lorentz Lunde kom til å reisa på sydentur og at «Tysnes»-journalist Øyvind Bjerkestrand kom til å delta på golturnering på Dalen. Den siste bommen var at han ikkje trudde det kom vedtak om kvar brua over Langenuen skulle gå.

– Eg rekna i grunnen med at det blei bestemt kvar brua skulle gå, så der må eg rett og slett ha trykt feil, forklarar vinnaren.

Resten av spørsmåla hadde han stålkontroll på, mellom anna at Kåre Martin Kleppe blei sittande vidare som ordførar etter valet.

– Det var heilt sjølvsagt at han framleis kom til å vera ordførar, seier Olav.

Han trefte også på spørsmålet om Knut Rage kom til å gje ut roman i 2019.

– Eg kjenner Knut godt, me er administratorar i lag på «Tysnes før i tio»-sida på Facebook. Eg rekna med at han kom med roman også i 2019. Den karen rekk mykje, fortel Olav.


Historieinteressert

Det er ein strålande nøgd Olav som tek sigersintervjuet med «Tysnes». Intervjuet skjer via telefon, for Olav er for tida i Sandnes, der han jobba som lærar i mange tiår.

– Akkurat no jobbar eg med eit kåseri som eg skal framføra på eit eldresenter her i Sandnes. Det handlar om då tidlegare Høyland kommune gjekk over frå omgangsskule til faste skular, fortel han.

For dei fleste på Tysnes er det ikkje ukjent at Olav er særs interessert i historie, spesielt lokalhistorie. Han trur absolutt det kan vera ein fordel i spåmannskonkurransen.

– Ingen kan sjå inn i framtida utan å vita fortida, seier han.


Klar for ny runde

Sigeren i spåmannskonkurransen gjer at Olav også er gira på å delta i årets utgåve av konkurransen.

– Eg må jo delta i år òg. Eg kan ikkje gje meg med berre éin siger, seier han lattermild.

Og han er klar for å leggja ned arbeidet som må til for å hevda seg i toppen også i 2020.

– Eg skal leggja meg i hardtrening. Fysisk sett blir det mange turar i marka, medan det psykiske allereie er i orden, fortel han vidare.


Eksperttips

Han kjem gjerne med nokre tips for dei nye spåmannsspørsmåla. Han har mellom anna meir tru på «Tysnes»-redaksjonen si gjennomføringskraft i 2020 samanlikna med 2019. I fjor blei redaksjonen utfordra til å symja rundt Solstråleøya, noko Olav fekk heilt rett i at ikkje blei gjennomført. I år blir «Tysnes»-redaksjonen utfordra til å sykla rundt Tysnes.

– I år har eg trua på dykk, og kanskje blir det litt ekstra press når eg spår det her, fortel Olav.

Han har også trua på at kommunen kjem til å vedta å få inn det opphavelege Onarheimsseglet i kommunevåpenet, eit tema som engasjerer Olav.

– Det skulle berre mangla. Hordaland stal det i si tid, og no er det på sin plass at det kjem tilbake, seier han.

Olav er derimot meir skeptisk til om det kjem ny mobilmast mellom Våge og Uggdal.

– Det har eg ikkje trua på. Me blir sjeldan prioritert her ute i distrikta.


Kondomeri og nedrykk

«Tysnes» har sett på statistikken for kvart spørsmål i spåmannskonkurransen for 2019. Mellom anna svarte heile 96,5 prosent at Kondomeriet ikkje kom til å opna butikk på OnarTun, så får me håpa at dei 3,5 prosenta som hadde trua på Kondomeriet ikkje er altfor skuffa over utfallet.

Nesten 90 prosent fekk rett i at «Tysnes»-redaksjonen ikkje tok utfordringa med å symja rundt Solstråleøya, medan 87,8 prosent korrekt svarte nei på spørsmålet om snøggbåtruta mellom Tysnes og Os kom til å bli lagt ned.

I motsett ende fekk derimot 81,7 prosent feil på spørsmålet om a-laget til Njardar/Tysnes kom til å unngå nedrykk tilbake til 7. divisjon. Trass optimismen frå folket klarte dessverre ikkje a-laget å halda seg i 6. divisjon.

Det var også mange som trudde den internasjonale kvinnedagen skulle bli markert på Tysnes, noko som heller ikkje skjedde. Over 60 prosent bomma også på spørsmålet om komikar Hans Morten Hansen kom tilbake med nytt show på Mandelhuset i 2019. Men i det tilfellet var det derimot ikkje mye om å gjera, for Hansen returnerer til Mandelhuset allereie i februar.


Siste saker Gå til framsida

Dømt for ruskøyring

Ei kvinne frå Trøndelag er i Sunnhordland tingrett dømt for å ha køyrt i rusa tilstand på Tysnes. Hendinga fann stad hausten 2018.Kvinna var tiltalt for å ha køyrt bil med ein alkoholkonsentrasjon i blodet på minst 2,08 promille. Ho erkjente seg ikkje skuldig etter tiltaleavgjerda.Eit av punkta som vart drøfta i retten var kor høg promille kvinna faktisk hadde då ho køyrde, og...

Frå barnehage til militæret

Sjurd Sandvik Pedersen hadde eit halvt års ventetid mellom vidaregåande og militæret. Det enda med vikarjobb i Lunde barnehage.