NYTT: "Barnas restaurant" er eit heilt nytt konsept som blei lansert på Haaheim Gaard laurdag. Med på prosjektet er Nils-Henning Nesje, chefs-kokk og samarbeidspartnar med Torstein Hatlevik.
NYTT: "Barnas restaurant" er eit heilt nytt konsept som blei lansert på Haaheim Gaard laurdag. Med på prosjektet er Nils-Henning Nesje, chefs-kokk og samarbeidspartnar med Torstein Hatlevik.

Chefs-kokk Nils-Henning testa ut nytt barnekonsept på Haaheim

Ute høljeregnar det. Inne er det varmt, lunt og koseleg. Det er «Barnas restaurant» på Haaheim.
Publisert 12.01.2020 kl. 19.22. Oppdatert 13.01.2020 kl. 11.02.

Nærare 25 unge restaurantgjester har innteke matsalen på Haaheim denne laurdagen tidleg i januar. Borda er dekte med kvite dukar og fint dekketøy. Serveringa er allereie i gang.


Salte vaflar og heimelaga is

– Jaaa, kjem det høgtlydt frå frammøtte barnestemmer, når chefs-kokk Nils-Henning Nesje spør dei unge restaurantgjestene om dei likar vaflar.

Vaflar er den tredje retten som skal serverast. Men det er ikkje tradisjonelle vaflar med jordbærsyltetøy gjestene skal få. På «Barnas restaurant» er vaflane salte, med langtidsbakte «pigwings» oppå. Dei blir servert i lag med to typar majones, den eine med raudbet og litt kvitløk, og den andre med purre, og det heile er pynta med ertespire på toppen.

Den neste retten som står på menyen er ost.

– Då skal me servera arme riddarar, dyppa i omelettrøre med litt kanel og steikt breieost og honning oppå, forklarar chefs-kokken.

Som dessert skal dei servera pannekaker som dei skal flambera inne i matsalen. Pannekakene blir servert i lag med med heimelaga vaniljeis.

– Det er fyrste gongen me arrangerer «Barnas restaurant». Det er ein gøy ting me gjer, forklarar chefs-kokken.


Frå Ålesund til Haaheim

Nils-Henning Nesje driv si eiga restaurantverksemd i Langevåg utanfor Ålesund. Han jobbar og for Chefs Dinner Norge, og er ein av dei faste kokkane i Chefsdinner-teamet, i lag med mellom anna Torstein Hatlevik. Denne helga har han teke fly eins ærend frå Ålesund for å vera med på «Barnas restaurant» hos Torstein Hatlevik og Haaheim Gaard.

Nils-Henning er ein av pådrivarane til det nye prosjektet. Målet er å gje barn og unge ei unik matoppleving.

– Når matministeren seier at me skal byggja matnasjonen Norge, så må me begynna med grasrota, dei unge. No testar me ut prosjektet, forklarar kokken.

Til Haaheim har han med seg dottera Sofie. Skal me tru chefskokken sjølv, så er det dottera som har pusha på for å få i gang det nye prosjektet.

Fyrste helga i mars blir det «Barnas restaurant» i Langevåg.


Kamskjel for fyrste gong

På ein av bordendane i den fint dekte matsalen sit brørne Sverre (6) og Jostein (snart 10) Hatteberg. Som bordkamerat har dei to Herman Lunde Klemmetsby.

– Me fekk laks og tartar med soyasauskrem som fyrsterett, fortel Sverre.

Kamskjel er den neste retten som servitør Elvis Kalvans skal koma med til dei tre gutane og dei andre rundt bordet.

– Kamskjel har eg ikkje smakt før, berre blåskjel. Det blir litt spennande, seier Jostein, og smiler.

Han røper at han gler seg.

– Ja, det blir veldig spennande, seier Herman, med glimt i auga.

Herman syntest den fyrste retten med laks og tartar var veldig god.

Elvis kjem med raud drikke på flasker. Gutane lurer på kva det er.

– Det er eplemost med bringebær, forklarar han.

– Å, det var godt. Ja, veldig, seier dei tre nesten i kor.


– Kjenn den gode lukta

– Å, kjenn den gode lukta, kommenterer Sverre, i det døra til kjøkenet glir open og servitøren kjem inn att.

Sverre har vore på Haaheim fleire gonger før, både i konfirmasjonsselskap og fleire gonger med barnehagen.

– På barnehagebesøka fekk me både pølser og risengrynsgraut, mimrar han.

Denne dagen er det derimot femrettars som står på menyen, med mange nye smakar.

På motsett side av dei tre gutane sit dei to søstrene Sigrid Johanna (8) og Solfrid Bleie Ulvestadbakken (12) frå Rosendal. Dei testar også ut «Barnas restaurant».

Dei to jentene er på dagstur til Haaheim i lag med mamma og pappa.

– Me var her ein gong i fjor, og så var eg her heilt i starten av Haaheim-prosjektet, fortel mamma Liv Signe, som kjenner Torstein Hatlevik godt frå korpsmiljøet.

– Det er imponerande kva Torstein har fått til her, kommenterer ho.


PÅ BARNAS RESTAURANT: F.v. Brørne Sverre (6) og Jostein Hatteberg (snart 10) kosar seg på "Barnas restaurant" på Haaheim, saman med bordkamerat Herman Lunde Klemmetsby.
PÅ BARNAS RESTAURANT: F.v. Brørne Sverre (6) og Jostein Hatteberg (snart 10) kosar seg på "Barnas restaurant" på Haaheim, saman med bordkamerat Herman Lunde Klemmetsby.
FRÅ ROSENDAL: Søskena Sigrid Johanna (8) og Solfrid Bleie Ulvestadbakken (12) hadde teke turen frå Rosendal for å vera med på «Barnas restaurant».
FRÅ ROSENDAL: Søskena Sigrid Johanna (8) og Solfrid Bleie Ulvestadbakken (12) hadde teke turen frå Rosendal for å vera med på «Barnas restaurant».
SERVITØR: Elvis Kalvans serverte dei unge restaurantgjestene på Haaheim.
SERVITØR: Elvis Kalvans serverte dei unge restaurantgjestene på Haaheim.

Siste saker Gå til framsida

Har du oversikt over kva du eig?

Ei undersøking gjennomført av Ipsos for Gjensidige viser at det berre er 25 prosent av hordalendingane som har dokumentert verdiane i heimen sin. Det kan by på unødvendige utfordringar i forsikringsoppgjeret, dersom du skulle bli råka av til dømes brann eller tjuveri. – Skjer det ein totalskade ved brann, er det nærmast umogleg å klara å hugsa alt ein har hatt av ting. Det same kan vera...