BØMLOGJESTER: For familiane Gåsland og Notland var det stas å koma til Haaheim og få møta Torstein og få oppleva stuntpoet Arne Torget. Bak f.v. Hege og Rune Gåsland, framme: Kjell og Liv Marit Notland.
BØMLOGJESTER: For familiane Gåsland og Notland var det stas å koma til Haaheim og få møta Torstein og få oppleva stuntpoet Arne Torget. Bak f.v. Hege og Rune Gåsland, framme: Kjell og Liv Marit Notland.

Frå Bømlo for å oppleva Arne Torget på Haaheim

– Haaheim er ein fantastisk plass for å finna roen, seier Hege og Rune Gåsland frå Bømlo.
Publisert 14.01.2020 kl. 18.24.

Fredag tok dei turen frå heimen på Bømlo til Haaheim. På programmet denne kvelden er det både verbale opplevingar med stuntpoet Arne Torget og gastronomiske opplevingar frå kjøkene. Femrettars står på menyen.


– Me har gledd oss veldig

Ekteparet Gåsland brukar karakteristikkar som avslappande og ein fin stad å vera når dei omtalar atmosfæren på Haaheim Gaard.

– Me har gledd oss veldig til dette. Haaheim er ein fantastisk god plass å vera, seier Rune.

– Ja, ein veldig god plass, framhevar Hege.

Ho har vore på Haaheim tidlegare, for Rune er det fyrste gongen.

Dei gler seg begge til å koma tilbake til sommaren.

– Det er imponerande kva Torstein har fått til her, seier dei nærast i kor.

For Hege er det ekstra stas å koma til Haaheim og få møta Torstein. Begge hadde barndomsåra sine på Bømlo.

– Me kjenner kvarandre godt frå tida då me spelte saman i Steinsbø skulekorps, seier ho.

Hege gjekk også i same klassen som Torstein på gymnaset.

Foreldra til Hege, Liv Marit og Kjell Notland, er også med til Haaheim. Dei fekk kvelden på Haaheim i julegåve.

Liv Marit og Kjell synest det er ekstra stas å få møta Torstein att. Torstein budde på hybel hjå dei då han gjekk på gymnaset.


Frå Ølen for å nyta heile helga

Medan gjestene frå Bømlo skal ha med seg fredagskvelden og overnatting til laurdag før dei dreg heim att, så skal Heidi og Eivind Lien frå Ølen nyta heile helga på Haaheim.

Stuntpoet Arne Torget skal opptre både fredag- og laurdagskvelden, og femrettars står på menyen begge kveldane.

Dei gler seg, og omtalar Torstein Hatlevik og Arne Torget som ein super kombinasjon.

– Me vann ein middag, men me visste kva me gjekk til, me har vore her fleire gonger tidlegare, så me tek heile helga, seier ekteparet Lien.

Ekteparet frå Ølen er også fulle av lovord når dei omtalar Haaheim. Dei er opptekne av den samla opplevinga dei får med seg, med både musikk og poesi.

– Sjølv om me bur i distriktet, er det heilt spesielt å koma til Haaheim. Ikkje berre for maten og middagen sin del, men plassen og atmosfæren, og at Torstein er veldig flink å by på seg sjølv, som til dømes når han spelar på luren, seier dei to nøgde og smilande gjestene frå Ølen.


Stuntpoeten innfridde

– Me begynner det nye året med litt poesi, og med mat både for magen og for hovudet, forklarar husfar Torstein når han ynskjer både tilreisande og lokale gjester frå Tysnes velkomne til Haaheim denne fredagskvelden.

Kokken Jimmy fortel om menyen; På femrettaren denne kvelden får ein servert både sild, kamskjel og lokal breiflabb. Og på dei fint dekte borda framfor gjestene står seks ulike glas på rekkje og rad. I kjend vitsestil fortel Torstein om ulike vintypar som ein kan få servert.

Mellom kvar matservering får gjestene ei verbal underhaldning frå stuntpoeten. Etter ein kort presentasjon og litt informasjon om deltakinga i Norske Talenter i haust, fekk me ein 20-vers lang introduksjon om kva gjestene kan venta seg denne kvelden.

Her er nokre av versa:

Som eit Soria Moria, høgt og fritt

Underleg å tenkja kor her var stritt.

Her har levd folk i hundrevis av år

På ein fredsæl plett i tronge kår.

Her hadde jegrane så gode kår

At hjorten var vekke i fleire hundre år.

På Håheim står enno fallosen under sol og måne.

Så kraftfull at ein kunne halda seg med to kåne.

På Auno sleit bonden som ein makk.

Men etter svartedauden låg garden brakk.

På 1500-talet vart det liv i hellinga så lun.

Opp kom eit tobølt klyngjetun.

Her var det storfolk å finne

Eigd av Karen Mowatt, noregs rikaste kvinne.

Å Baroniet kosta dei dyrt er ikkje å fornekta

Så på 1700-talet vart garden selt til Haaheim-slekta.

For her har Torstein over tid

Bygd opp sitt eiget vesle Baroni.

Her kan ein beint bli sakral

Med tanke på at Håheim var med å finaniserte Rosendal.

Så velkomne til bords og velkomne inn

For anledningen er det sytt for måneskinn.

Velkommen til den vakraste plassen i Norge

– direkte frå Haaheim, Arne Torget

Utover kvelden serverte han nye vers og forteljingar på løpande band. Nokre av versa var førehandsskrivne, andre serverte han rykande ferske, som han forfatta medan andre nytte maten. Som denne, etter at fyrste retten var servert:

Det kom sild på bordet i rett nummer ein

Det var jysla godt, men eg savna bein.

Lekkert med rogn på ei lito skjeva

Ja, no var det godt å leva.

– Eg har heile livet likt å leika med ord. Då eg gjekk på vidaregåande, skreiv eg eigne notat på rim. Og sidan har eg halde på, fortel han med glimt i auga til «Tysnes» sin utsende.

Dei fyrste dikta skreiv han då han var 13 år, og nokre av dei brukar han framleis når han reiser rundt og underheldt på ulike tilstellingar.

– Etter at eg kom til semifinalen i Norske Talenter, har det blitt ekstra mange oppdrag, medgjev 53-åringen frå Husnes, tidlegare televerktilsett som i dag jobbar i Kvinnherad Breiband. Poetoppdraga er på hobbybasis.

Han likar seg på Haaheim. Her er passeleg med publikum, ja, langt mindre enn då han deltok på direktesendt fjernsyn med 800 i salen.

– Her er det ei fantastisk setting, seier Arne Torget.

– Ja, eg kosar meg eg og, seier kona Line Valstad som også nyt helga på Haaheim.


FRÅ ØLEN: – Haaheim er ein fantastisk plass. Her er det veldig koseleg, seier helgegjestene Heidi og Eivind Lien frå Ølen.
FRÅ ØLEN: – Haaheim er ein fantastisk plass. Her er det veldig koseleg, seier helgegjestene Heidi og Eivind Lien frå Ølen.
HUMORISTISK: Stuntpoet Arne Torget fekk fram både låtten og smilet til gjestene på Haaheim.
HUMORISTISK: Stuntpoet Arne Torget fekk fram både låtten og smilet til gjestene på Haaheim.
NYE VERS: Medan gjestene på Haaheim nytte serveringane, brukte Arne Torget tida til å dikta nye vers som han serverte utover kvelden.
NYE VERS: Medan gjestene på Haaheim nytte serveringane, brukte Arne Torget tida til å dikta nye vers som han serverte utover kvelden.

Siste saker Gå til framsida

Dømt for ruskøyring

Ei kvinne frå Trøndelag er i Sunnhordland tingrett dømt for å ha køyrt i rusa tilstand på Tysnes. Hendinga fann stad hausten 2018.Kvinna var tiltalt for å ha køyrt bil med ein alkoholkonsentrasjon i blodet på minst 2,08 promille. Ho erkjente seg ikkje skuldig etter tiltaleavgjerda.Eit av punkta som vart drøfta i retten var kor høg promille kvinna faktisk hadde då ho køyrde, og...

Frå barnehage til militæret

Sjurd Sandvik Pedersen hadde eit halvt års ventetid mellom vidaregåande og militæret. Det enda med vikarjobb i Lunde barnehage.