BYGDAFEST: Laurdag kveld inviterte Mandelhuset til bygdafest, og Gunslingers fekk spela for 250 feststemte tysnesingar og tilreisande.
BYGDAFEST: Laurdag kveld inviterte Mandelhuset til bygdafest, og Gunslingers fekk spela for 250 feststemte tysnesingar og tilreisande.

Bygdafest med Gunslingers og 250 feststemte

Det var stappfullt på Mandelhuset då Gunslingers spelte opp til fest laurdag.
Publisert 19.01.2020 kl. 12.00.

– Det har komt folk frå både Øygarden, Bømlo, Øystese og fleire plassar, og sjølvsagt mange tysnesingar, fortel ein godt nøgd Patrick Russell Madsen.

Den daglege leiaren på Mandelhuset står ute og tar i mot dei siste besøkande, medan konserten og festen er i full gang inne.

Laurdag kveld arrangerte nemleg Mandelhuset bygdafest, med sjølvaste Gunslingers som hovudattraksjon.

– Me er utseld, så det betyr at det er 250 personar til stades, fortel Madsen.


Gjenntok suksessen

Dette er andre året på rad at Mandelhuset arrangerer bygdafest i januar. I fjor var det kultbandet Luxus Leverpostei som spelte, og arrangementet blei ein stor suksess. Madsen er strålande nøgd med at folk også strøymde til Gunslingers-konserten.

– Me har sett på korleis me skal tena pengar på denne årstida, og det er heilt fantastisk at me klarar å samla så mange til fest i januar, seier han.

På den nye parkeringsplassen i Våge står det både ein buss og fleire campingvognar, som beviser at folk har komt langvegsfrå for å få med seg bygdafesten.

Med to suksessfull bygdafester, er Madsen trygg på at dei vil føra konseptet vidare også neste år.

– Me kjem nok til å køyra på fram til me går på ein smell, seier han.


Siste saker Gå til framsida