NYTT TAP: Damelaget gjekk dessverre på eit tap heime mot Fana 3 søndag ettermiddag.
NYTT TAP: Damelaget gjekk dessverre på eit tap heime mot Fana 3 søndag ettermiddag.

Tøff batalje enda med tap

Damelaget leverte ein god kamp sjølv om det blei tap mot Fana 3 søndag.
Publisert 20.01.2020 kl. 14.00.

– Eg trur alle på laget er fornøgd med innsatsen. Me blir berre betre og betre, fortel Tysnes-spelar Maria Lillesletten Hagen etter kampen mot Fana 3 søndag.

Som i kampen mot Viking TIF 2 fredag kveld, blei det tap for Tysnes også mot Fana 3 søndag, men stemninga var likevel god etter kampen.

– Me hevar oss frå kampen på fredag. Då var det meir opp og ned i prestasjonane, medan me i dag spelar jamt godt gjennom heile kampen, seier Lillesletten Hagen.


Tøff start

Fana 3 låg før kampen godt framfor Tysnes på tabellen, og var klare favorittar. Tysnes-trenar Terje Sløgedal spådde på førehand at det kunne bli ein endå tøffare kamp enn mot Viking TIF fredag, då tysnesingane tapte 19-27.

Og heimelaget fekk det tøft i starten av oppgjeret. Tysnes sleit med å spela seg gjennom eit hardt pressande og fysisk sterkt Fana-forsvar, og det tok ikkje lang tid før bortelaget leia 0-3.

I det åttande minutt sette Linda Flornes inn heimelaget sitt fyrste mål etter ein hurtig overgang. Det var likevel Fana som var best i opninga, men ei rekkje solide redningar av Ragnhild Dalland heldt Tysnes inne i matchen og sørgde for at bortelaget ikkje fekk meir enn fire måls forsprang halvvegs i omgangen.


Kjempa godt

Deretter følgde ein betre periode for heimelaget. Samtidig som Fana begynte å gjera meir feil i angrep, klarte Tysnes å spela seg til fleire sjansar. Etter 15 spelte minutt leia bortelaget 3-7, men så løsna det for heimelaget. Fyrst reduserte Kristin van der Meeren til 4-7, men Fana svarte fort og gjekk opp til 4-8. Deretter hamra Lillesletten Hagen ballen i krysset til 5-8, før van der Meeren fann Norunn Ebbesvik på streken som sikkert sette inn nok ei redusering.

Laga følgde kvarandre tett dei neste ti minutta. Både tilreisande og heimesupportarar laga god stemning i Tysneshallen, og det smitta heilt klart over på laga på banen, som begge leverte mykje godt spel.

Då det nærma seg pause, klarte bortelaget i løpet av eit par minutt å auka leiinga frå 9-11 til 9-14, og dermed sikra seg eit godt resultat inn til pause. Likevel kom kampen sitt store høgdepunkt for Tysnes like før pause, då flott Tysnes-spel enda i ein flygar som Lillesletten Hagen banka inn. Fana svarte med ei mønsterkontring, og fastsette pauseresultatet til 10-15.


Gode takter

Trenar Terje Sløgedal var godt nøgd med innsatsen i fyrste omgang.

– Dei er veldig påskrudde, og det er mykje godt spel, fortalde han i pausen.

Planen i andre omgang var dermed å fortsetja med det gode spelet.

– Me må prøva å halda tempoet oppe, og få endå fleire løp og bevegelsar mot mål, sa han.

Tysnes fekk ein god start på andre omgang, og mål frå van der Meeren, Lillesletten Hagen, Renathe Hagen-Lunde og Mia Jensen Nes førte på nytt tysnesingane opp i ryggen på bergensarane. Då keeper Dalland i tillegg redda straffe etter åtte minutt, såg det lovande ut for heimelaget.


Enda med tap

Begge laga spelte godt i midten av omgangen, men heimelaget sleit med å finna nettmaskene. Fana drog i frå, og halvvegs i omgangen var stillinga 17-25, og kampen var meir eller mindre avgjort. Bortelaget skrudde så opp eit ekstra hakk, og hamna etter kvart ti mål foran Tysnes.

Heimelaget fortsette å kjempa, og avslutta kampen godt. Dalland hadde fleire solide redningar, og van der Meeren, Lillesletten Hagen, Flornes og Anni Elise Trondsen Dalland sette dei fire siste måla i kampen.

Tysnes avgrensa dermed tapet, og sluttresultatet blei 24-31.


Nøgd trass tap

Sjølv om det blei tap, var trenar Sløgedal godt nøgd med det han såg av laget sitt.

– Det var ein veldig god kamp, og me står 2x30 minutt som aldri før. Det er flott å sjå at me fullfører kampen med godt spel, fortel han.

Med seg hadde damelaget også nokre spelarar frå J16-laget, som fekk vist seg fram for heimepublikummet. Maren Jensen Nes, Annica Reimdal Vee og Mia Jensen Nes fekk alle speletid, og dei to sistnemnde fekk også med seg kvar si scoring.

– Det er veldig kjekt at jentene frå J16-laget kjem inn og gjer det bra. Dette var eit kjekt tap, seier Sløgedal.

Maria Lillesletten Hagen og Kristin van der Meeren blei Tysnes sine toppscorarar med seks mål kvar. Lillesletten Hagen var etter kampen godt nøgd med kva ho sjølv fekk til. Ho fekk mellom anna vist fram ein meget solid skotarm i kampen.

– Eg følte det losna ordentleg for meg sjølv i dag, og det har eg venta på, seier ho.

Allereie fyrstkomande laurdag skal damelaget på nytt i aksjon i Tysneshallen. Då ventar Bønes 2 på motsett halvdel.





HANG MED: Tysnesingane gav bortelaget god motstand, men tapte til slutt 24-31.
HANG MED: Tysnesingane gav bortelaget god motstand, men tapte til slutt 24-31.
NØGD: Sjølv om det blei tap var både trenar og spelarar godt nøgd med spelet til Tysnes.
NØGD: Sjølv om det blei tap var både trenar og spelarar godt nøgd med spelet til Tysnes.
UNGDOMSSPELAR: Fleire J16-spelarar fekk prøvd seg søndag, mellom anna Annica Reimdal Vee, som også fekk eitt mål i protokollen.
UNGDOMSSPELAR: Fleire J16-spelarar fekk prøvd seg søndag, mellom anna Annica Reimdal Vee, som også fekk eitt mål i protokollen.
TØFFE TAK: Fana 3 møtte Tysnes med eit tøft og fysisk forsvarsspel.
TØFFE TAK: Fana 3 møtte Tysnes med eit tøft og fysisk forsvarsspel.
STREKSPELAR: Norunn Ebbesvik blei godt passa på på streken, men klarte å scora to gongar mot bergensarane.
STREKSPELAR: Norunn Ebbesvik blei godt passa på på streken, men klarte å scora to gongar mot bergensarane.
SEKS MÅL: Heile seks gongar kunne Maria Lillesletten Hagen jubla for mål. Ho blei delt toppscorar for Tysnes saman med Kristin van der Meeren.
SEKS MÅL: Heile seks gongar kunne Maria Lillesletten Hagen jubla for mål. Ho blei delt toppscorar for Tysnes saman med Kristin van der Meeren.
VIKTIG SPELAR: Renathe Hagen-Lunde spelte som vanleg ein god kamp, og scora fire mål.
VIKTIG SPELAR: Renathe Hagen-Lunde spelte som vanleg ein god kamp, og scora fire mål.
NY MOGLEGHEIT: Fyrstkomande laurdag skal laget på nytt i aksjon i Tysneshallen. Då kjem Bønes 2 på besøk.
NY MOGLEGHEIT: Fyrstkomande laurdag skal laget på nytt i aksjon i Tysneshallen. Då kjem Bønes 2 på besøk.
GOD KAMP: Med sine seks mål leverte Kristin van der Meeren nok ein god kamp.
GOD KAMP: Med sine seks mål leverte Kristin van der Meeren nok ein god kamp.

Siste saker Gå til framsida

No skal klokka stillast igjen

Det er mykje som er endra i samfunnet i desse koronatider, men ein ting går som planlagt: overgangen til sommartid. Natt til søndag skal nemleg klokka stillast ein time fram, og dei som skal tidleg opp på jobb får ein time mindre på puta. Til gjengjeld kan me i tida framover nyta ljosare kveldar.

– Me har opplevd utruleg god støtte

SvingenPuls er blant verksemdene som har måtta stengja som eit resultat av koronatiltaka. Leiar Marthe G. Birkeland prøver å gjera det beste ut av situasjonen, og set stor pris på støtta frå medlemmane.

Sløkk ljoset for miljøet

Er du korona-rastlaus og lengtar etter noko meiningsfullt å finna på? Vil du bidra med noko ifrå sofakroken? Då har me gode nyheiter.