GJENG PÅ TI: Nesten alle rundt dette bordet var med på Lærlingaften i fjor. Det var så bra at dei måtte gjenta opplevinga i år, og fekk fleire med seg. F.v. Arne Tvedt, Anne-Marit og Svenn Audun Frugård, Hildegunn Berge, Anne Russell, Sigrid Hope, Arnt og Wenche Vik, og Vigdis Frugård Tvedt.
GJENG PÅ TI: Nesten alle rundt dette bordet var med på Lærlingaften i fjor. Det var så bra at dei måtte gjenta opplevinga i år, og fekk fleire med seg. F.v. Arne Tvedt, Anne-Marit og Svenn Audun Frugård, Hildegunn Berge, Anne Russell, Sigrid Hope, Arnt og Wenche Vik, og Vigdis Frugård Tvedt.

– Dette har eg veldig trua på

Det seier Vigdis Frugård Tvedt, medan ho ventar på den første av fem rettar.
Publisert 26.01.2020 kl. 14.37. Oppdatert 27.01.2020 kl. 10.00.

Laurdag kveld gjentok Mandelhuset suksessen frå i fjor, og skipa sin andre Lærlingaften, der lærling Kristoffer Heggland Turøy fekk styra menyen og råvarene.

– Me var her på Lærlingaften i fjor, og det var ei fantastisk oppleving, med utruleg god mat. Så me håpar på det same i år òg, seier Vigdis.


Sosialt

Ho var blant over seksti gjestar som kunne gle seg til ein fem-rettar inspirert av vestlandskysten.

– Det er viktig å støtta opp om Mandelhuset, seier mannen Arne Tvedt.

– Og så er det veldig kjekt og sosialt å sitja ute og prata saman, over god mat og drikke, smiler han.

I fjor var dei åtte stykk. I år har dei fått med seg to til; Wenche og Arnt Vik, og heile veneflokken er frå Våge.

Vigdis synest det er stas å komma til duk og dekt bord.

– Det er noko med å kle seg pent, og ha ei slik oppleving i flotte lokale.


Spent

Etter å ha høyrt mange lovord om arrangementet, har Wenche Vik gledd seg mykje til denne laurdagen.

– Me fekk ikkje dette med oss i fjor, så då tenkte me å prøva oss i år, seier ho spent.

– No gler me oss til å nyta kvelden, smiler ho. Me spør Vigdis kva ho gler seg mest til av det som står på menyen.

– Brunost-isen, den kan bli interessant, seier ho.

– Eg er nok mest spent på den eg ikkje veit kva er for noko, held ho fram.

Ho siktar til porchetta med ratatouille, timiansaus og pærepotet.


Nervane under kontroll

«Tysnes» snik seg ein tur ut på kjøkenet for å sjå om lærlingen held koken.

– Korleis er nervane?

– Dei er under kontroll, smiler han, medan han sirleg men effektivt danderer tallerkane til dei over seksti som sit forventningsfullt til bords.

– Dette er vel noko av det mest spenstige du har gjort så langt?

– Ja, det kan du trygt seia.

Det store smilet er framleis på plass.


Framtidsretta rett

Første rett var selleri- og potetsuppe med urteolje og sprø spekeskinke.

No er det ceviche av breiflabb med granateple og vårløk som står for tur.

– Det er fisk som har blitt laga i ei syreblanding av sitron og lime, fortel han.

– Det er ein moderne rett, og eg liker å tenkja litt framtidig i måten eg lager maten på.


Trur folk blir fornøgd

Det er mange rettar som skal lagast, og ikkje lenge etter han har presentert rett nummer to for gjestane, er Kristoffer i sving med porchetta med ratatouille, timiansaus og pærepotet. Det er den Vigdis var mest spent på.

– Denne retten trur eg folk blir fornøgd med, seier han, og avslørar at timian er favoritturta hans.

– Kva er din personlege favoritt på menyen då?

– Det må vera brunost-isen.


Godt jobba

Kristoffer har i hovudsak fått køyra showet heilt åleine, men kjøkensjef Linn Mari Kvamsdal har hjelpt til med gode tips undervegs.

– Det har vore hans jobb å planleggja kvelden, menyen, råvarene og kor mykje han treng, seier dagleg leiar Patrick Madsen.

Han synest Kristoffer har gjort ein god jobb frå a til å.

– Han har ein god samansetnad av forskjellige smakar og rettar som passar fint i lag. Eg er sikker på at gjestane får ei veldig god oppleving, avsluttar han.


SJØLVSTENDIG: Lærlingen Kristoffer Heggland Turøy har stått for å kokkelera ut menyen og rekna ut mengde med råvarer.
SJØLVSTENDIG: Lærlingen Kristoffer Heggland Turøy har stått for å kokkelera ut menyen og rekna ut mengde med råvarer.
FRAMTIDSRETTA: Ifølgje lærlingen er denne kreasjonen av breiflabb-ceviche ein moderne rett. Han likar å tenkja framtidig når han skal laga mat.
FRAMTIDSRETTA: Ifølgje lærlingen er denne kreasjonen av breiflabb-ceviche ein moderne rett. Han likar å tenkja framtidig når han skal laga mat.
PENT: Ein vakkert komponert meny, og fargerike rettar. Prikken over i-e var eit nennsamt dekt bord.
PENT: Ein vakkert komponert meny, og fargerike rettar. Prikken over i-e var eit nennsamt dekt bord.
HEKTISK: Fem servitørar og tre i kjøkenet var i sving på Lærlingaften.
HEKTISK: Fem servitørar og tre i kjøkenet var i sving på Lærlingaften.

Siste saker Gå til framsida

Små skattar

Stundom kjem fortida ganske nær, i form av ein personleg utforma reidskap, eit kledestykke eller eit par briller frå slutten av 1800-talet. Det er nesten som me har det mennesket som har brukt desse tinga i kvardagen ein gong for lenge sidan like framfor oss.