HANDBALL-HELG: Jenter 13-laget til Tysnes IL var eitt av fleire lag som var i aksjon i helga. For J13 enda det med eit knipe tap mot Fana. (Foto: Ella Sandra Dahl Berland)
HANDBALL-HELG: Jenter 13-laget til Tysnes IL var eitt av fleire lag som var i aksjon i helga. For J13 enda det med eit knipe tap mot Fana. (Foto: Ella Sandra Dahl Berland)

Aktiv handballhelg

Fleire Tysnes-lag var i aksjon på handballbanen i helga.
Publisert 27.01.2020 kl. 16.34.

Tysnes-handballen rullar og går, og fleire lag var i aksjon i helga. Laurdag spelte både Jenter 13-laget og damelaget i Tysneshallen, medan Jenter 16 tok turen til Stord søndag.

Medan begge dei aldersbestemte laga gjekk på tap i sine oppgjer, klarte damelaget ein solid uavgjort mot ein motstandar høgt plassert på tabellen.


To-målstap

Men det var Jenter 13 som opna helga. Dei fekk besøk av Fana i Tysneshallen, som på førehand låg to poeng bak tysnesingane kring midten av tabellen.

Det blei ein jamn kamp, og laga følgde kvarandre tett. Med fem minutt igjen stod det 10-10, men bortelaget avslutta best og sikra sigeren 10-12.

– Dei jobba godt, fortel trenar Geir Austvik, som peiker på at laget fekk ein uheldig skade tidleg i kampen.

– Alma Vermedal måtte ut etter eit overtråkk tidleg i kampen, så då fekk me litt mindre flyt i angrepsspelet. Me er ikkje så mange på laget, og då er me avhengige av alle. Men jentene stod på. Det hakka litt i angrep, men dei sleppte ikkje inn så mange mål bakover, fortel trenaren.

Dei to laga ligg dermed likt på midten av tabellen. Allereie fyrstkomande laurdag skal J13-laget i aksjon i Tysneshallen igjen. Då står botnlaget Askøy på motsett halvdel.

– Det er eit lag me absolutt har sjanser mot, seier Austvik.


Uavgjort

Damelaget til Tysnes IL har hatt ein tøff periode med fem strake tap. Stemninga har likevel vore god i laget, og dei har vist mykje godt spel. Laurdag fekk dei også med seg eit poeng då Bønes 2 kom på besøk. Bergenserane låg godt framfor Tysnes på tabellen, og er med og kjempar om andreplass i avdelinga bak topplaget Kjøkkelvik 2.

Kampen var jamn frå start til slutt, og enda til slutt 20-20.

– Det var ein spennande kamp og eit kjekt resultat, fortel Austvik, som var trenarvikar for Terje Sløgedal i oppgjeret.

– Eg maste mykje på dei i det defensive spelet, og dei jobba som heltar i forsvar. Dei hadde òg mange fine angrep, fortel han vidare.

Ein av dei største heltane for Tysnes blei Anni Elise Trondsen Dalland, som scora halvparten av måla til heimelaget.

– Ha hadde mange flotte avslutningar, fortel Austvik.

Også i dei bakerste rekkjene er det skryt å få. I mål stod nemleg Emma Marie Bruntveit, som til vanleg spelar for J16-laget.

– Emma stod ein god kamp i mål. Det var veldig kjekt å sjå, seier Austvik.


Tap i tøff avdeling

Søndag var Jenter 16 i aksjon då dei tok turen til Stordhallen for å møta Stord. J16 spelar i ei tøff avdeling, og har berre éin siger på elleve kampar denne sesongen. Mot Stord blei det eit nytt tap.

– Me har spelt nokre kampar mot Stord tidlegare, og då har me gjerne tapt med tre-fire mål, fortel Austvik, som også er trenar for Jenter 16.

Mot Stord blei det derimot tap med siffera 21-14.

– Det var jamt til pause, men så drar dei gradvis ifrå i andre omgang. Jentene står på og gjer så godt dei kan, men Stord er eit betre lag enn oss, fortel trenaren.

Sjølv om J16-laget ikkje har plukka mange poeng denne sesongen, håpar Austvik at dei får noko ut av å spela i ein tøff avdeling.

– Me speler på eit tøffare nivå enn i fjor. Me har vore gode i fleire kampar, og eg håper at spelarane får noko godt ut av kampane sjølv om det blir tap. Eg føler at me blir betre og betre, seier Austvik.


Siste saker Gå til framsida

Lesarbrev: Takk til alle heltene som jobber i dagligvarebutikkene i Vestland

I møtet med koronakrisen trer nå mange helter fram. Mange i samfunnskritiske funksjoner jobber på spreng. Det viser tydeligere enn noen gang hvor viktige disse funksjonene er. Som næringsminister vil jeg gjerne rette en spesiell takk til alle heltene i butikkene. Som hver dag stiller på jobb for å sikre mat på bordet til alle oss andre, de som sitter i front og de som står på for å sikre at...

No skal klokka stillast igjen

Det er mykje som er endra i samfunnet i desse koronatider, men ein ting går som planlagt: overgangen til sommartid. Natt til søndag skal nemleg klokka stillast ein time fram, og dei som skal tidleg opp på jobb får ein time mindre på puta. Til gjengjeld kan me i tida framover nyta ljosare kveldar.

– Me har opplevd utruleg god støtte

SvingenPuls er blant verksemdene som har måtta stengja som eit resultat av koronatiltaka. Leiar Marthe G. Birkeland prøver å gjera det beste ut av situasjonen, og set stor pris på støtta frå medlemmane.