KOM DEG UT-DAG: Komande søndag arrangerer Tysnes Turlag Kom deg ut-dag ved varmestova til Onarheim IL i Solheimsdalen.
KOM DEG UT-DAG: Komande søndag arrangerer Tysnes Turlag Kom deg ut-dag ved varmestova til Onarheim IL i Solheimsdalen.

Varmestova blir samlingsplass for Kom deg ut-dagen

Over heile landet blir Kom deg ut-dagen markert komande søndag. Lokalt ynskjer det nystifta Tysnes Turlag velkomen til Solheimsdalen.
Publisert 31.01.2020 kl. 12.00.

– Planen vår er å laga ein natursti rundt Onarheim idrettslag si varmestove i skianlegget i Solheimsdalen, seier Rebekka Høgestøl, leiar i interimstyret for det nye turlaget.

Tidlegare har Onarheim IL skipa til aktivitetar på Kom deg ut-dagen.

– Me fekk tips om at dei ikkje hadde høve til dette i år. Difor prøver me oss med eit arrangement, seier Høgestøl.


Bålpanner og natursti

Hovudmålet er at folk skal koma seg ut i naturen og kanskje møta nye vener med same interesse på vegen. Ved varmestova blir det fyr i bålpanner og høve til utelunsj. Og blir det kaldt og surt på søndag, har turlaget fått disponera varmestova slik at folk kan koma inn og varma seg.

Wenche Strømme frå Den Norske Turistforening, Bergen og Hordaland, vil også ta turen, både for å snakka om DNT, Barnas Turlag og det nystifta turlaget på Tysnes.

– Me ynskjer at endå fleire skal bli kjent med oss, at folk kjem seg ut og at me får fleire friviljuge med i laget vårt, seier Rebekka Høgestøl.

Barnas turlag er ei eiga gruppe under dei ulike turlaga. Målgruppa er born i alderen null til tolv år.

– Det er målet vårt å få til ei slik gruppe på Tysnes også for å få endå fleire til å oppleva gleda ved å vera ute i naturen med turar eller aktivitetar, seier ho.


Nasjonal satsing

Kom deg ut-dagen er Den Norske Turistforening sin nasjonale turdag.

– Denne dagen ynskjer me å gje deg ein smakebit av friluftslivet, forhåpentlegvis ein smakebit som gir meirsmak, skriv DNT på nettsida si.

Her kan me lesa at tilboda er gratis, og i den grad det kostar noko, så er prisen for aktivitetane kraftig subsidiert. Turleiarar og aktivitetsleiarar er med på alle arrangementa, og ordnar med bål og grillar.

– Denne dagen får du anledning til å prøva noko du ikkje har vore med på før, skriv DNT.

Kom deg ut-dagen blir arrangert to gonger i året, i februar og i september.

– Dermed kan du få delta i eit mangfald av aktivitetar som spenner frå turar, klatring, leik og natursti om hausten, til aking, skileik og isfiske vinterstid, er lovnader frå DNT.


85 medlemer

Dei som ikkje kan ta turen til Solheimsdalen søndag, finn meir om det nye turlaget på nettsida www.tysnes.dnt.no, eller på Facebook-gruppa Tysnes Turlag.

Rebekka Høgestøl blei imponert då ho fekk informasjon om at DNT har 85 medlemer på Tysnes.

– Alle som har betalt medlemskap i DNT blir automatisk med i det lokale turlaget på Tysnes utan å betala ytterlegare medlemskap, forklarar ho.

Ho håpar at mange kjem på stiftingsmøtet 18. februar i kommunestyresalen.

– At me er så mange som likar å vera ute, er gøy. Målet til Tysnes Turlag er å inkludera folk frå heile øya, seier ho.


Siste saker Gå til framsida

No skal klokka stillast igjen

Det er mykje som er endra i samfunnet i desse koronatider, men ein ting går som planlagt: overgangen til sommartid. Natt til søndag skal nemleg klokka stillast ein time fram, og dei som skal tidleg opp på jobb får ein time mindre på puta. Til gjengjeld kan me i tida framover nyta ljosare kveldar.

– Me har opplevd utruleg god støtte

SvingenPuls er blant verksemdene som har måtta stengja som eit resultat av koronatiltaka. Leiar Marthe G. Birkeland prøver å gjera det beste ut av situasjonen, og set stor pris på støtta frå medlemmane.

Sløkk ljoset for miljøet

Er du korona-rastlaus og lengtar etter noko meiningsfullt å finna på? Vil du bidra med noko ifrå sofakroken? Då har me gode nyheiter.