PÅ HAAHEIM: Den annerkjende jazzmusikaren Solveig Slettahjell spelte konsert på Haaheim Gaard laurdag kveld.
PÅ HAAHEIM: Den annerkjende jazzmusikaren Solveig Slettahjell spelte konsert på Haaheim Gaard laurdag kveld.

– Eit eventyr å koma hit

Konserten med Solveig Slettahjell laurdag enda med trampeklapp, lovord og dobbelt ekstranummer.
Publisert 02.02.2020 kl. 12.00.

– Eg storkoste meg, fortel Solveig Slettahjell etter konserten hennar på Haaheim Gaard laurdag kveld.

Hovudsalen var fullsett då den populære jazzmusikaren sette seg bak pianoet. Konserten handla kun om Slettahjell og pianoet, og publikum fekk oppleva ei stemningsfull stund med mange musikalske høgdepunkt.

– Tusen takk for at eg er invitert til å spela her. Det er eit eventyr å koma hit, sa ho til publikum etter opningsnummeret.


60-årsgave

Blant publikum sat ekteparet Karl Erik Berge og Kjersti Kildahl. Dei var strålande nøgd med konserten, og likte godt formatet med at det berre var Slettahjell og pianoet.

– Det gjer noko med stemninga når det berre er ho, og ein kjem så tett innpå, fortel Kjersti.

Ekteparet likte alle innslaga, men hadde nokre favorittar.

– Eg syntest dei ho song på norsk var ekstra flotte, fortel Karl Erik.

Både Kjersti og Karl Erik kjem opphaveleg frå Hardanger-regionen, men bur i Ås sør for Oslo. Det betyr at dei hadde kome langvegsfrå for ei helg på Haaheim.

– Me fekk denne helga, med konserten, i 60-årsgåve, seier Karl Erik.

Dei var begge godt nøgde med opplevingane på Haaheim.

– Det er imponerande kva ein har fått til her ute, med nydeleg mat og god atmosfære, fortel Karl Erik.


Kjem gjerne tilbake

Etter konserten hausta artisten trampeklapp, og kom tilbake til pianoet heile to gongar for å gjera ekstranummer.

– Det er utruleg flott å møta eit så entusiastisk publikum, fortel Slettahjell.

Ho er også imponert over Haaheim.

– Det er heilt fantastisk å reisa rundt og koma til stader som dette, der det er så mykje skaparkraft, seier artisten.

– Eg kjem gjerne tilbake, avsluttar ho.


FULL SAL: Mange møtte fram for å få med seg konserten.
FULL SAL: Mange møtte fram for å få med seg konserten.
INTIMKONSERT: Slettahjell har spelt mykje med fullt band, men på Haaheim handla det berre om henne og pianoet.
INTIMKONSERT: Slettahjell har spelt mykje med fullt band, men på Haaheim handla det berre om henne og pianoet.

Siste saker Gå til framsida

Frå tømrar til byggingeniør

Sindre Økland starta yrkeslivet som fagutdanna tømrar, før han forsette med ei teoretisk utdanning og enda opp som byggingeniør.

Leiar: Nytt veterinærkontor er gladnytt for Tysnes

Måndag var det offisiell opning av det nye veterinærkontoret på Tysnes. Det er godt nytt for lokalsamfunnet Tysnes. Å ha eit lokalt veterinærkontor i kommunen som også er eit smådyrkontor, har lenge vore eit sakn. Det er positivt at ein har veterinærar som vågar å satsa på dette. Så får me berre håpa at det nye...