SIGER: Maria Andronikidu banka inn fire mål då J13-laget slo Askøy i Tysneshallen laurdag.
SIGER: Maria Andronikidu banka inn fire mål då J13-laget slo Askøy i Tysneshallen laurdag.

Vann nervepirrande oppgjer

Det blei tett og jamt då J13 fekk besøk av Askøy laurdag.
Publisert 03.02.2020 kl. 15.36. Oppdatert 04.02.2020 kl. 13.57.

– Det var veldig deilig å endeleg få ein siger igjen, seier ein strålande nøgd Ingvil Vermedal etter kampen laurdag.

Tysnes sitt Jenter 13-lag fekk besøk av Askøy, til det som blei ein nerverpirrande kamp i Tysneshallen. Tysnes-jentene hadde ikkje vunne sidan dei sist møtte Askøy, og kunne til slutt jubla over ein ny siger mot dei tilreisande.


Følgde kvarandre

Starten av kampen blei målfattig, men dei måla som kom, var det Tysnes som stod for. Halvvegs i omgangen leia heimelaget 3-0 etter to mål av Maria Andronikidu og eitt av Tora Nødland Austvik. Deretter kom Askøy tilbake i kampen, og fekk kneppa inn på forspranget. Til pause leia Tysnes berre med eitt mål, med stillinga 5-4.

I den andre omgangen fekk bortelaget den beste starten, og var etter fire minutt i leiinga 5-6. Heimelaget klarte å svara, og snudde resultatet tilbake i favør Tysnes. Sjølv om bortelaget hang godt med spelemessig, klarte dei aldri å ta leiinga frå Tysnes-jentene, som dermed vann kampen 10-8.

– Dette blei spennande, fortel trenar Geir Austvik etter kampen.


Keeper-skryt

Han skrytte av spelarane sine etter oppgjeret.

– Det er eit par lag i avdelinga som er betre, men på ein god dag kan me slå alle, fortel han.

Ein som fekk ekstra mykje skryt, var keeper Isarlin Cristal Nødland, som til vanleg spelar på J11-laget.

– Ho speler ein kjempekamp i målet, seier trenar Austvik.

Ho var sjølv godt nøgd med innsatsen, sjølv om ho var spent på førehand.

– Eg var veldig nervøs, seier Isarlin.

Lagvenninna Ingvil er klar på kor viktig det er med ein god keeper.

– Det er veldig viktig. Viss me er sløve i forsvar så kan keeperen redda oss, og det gjorde ho absolutt i dag, seier Ingvil.


Tapte neste dag

J13-laget hadde ein ny kamp allereie på søndag. Då reiste dei til Sotra for å møta laget med same namn. Det enda med tap 20-9. Tysnes ligg dermed midt på tabellen med tolv poeng. Det er ei jamn avdeling, og berre fire poeng opp til Søreide på toppen.

– Viss me vinn resten av kampane våre så har me ein sjanse, seier Ingvil.


Siger for J16

Det var også fleire Tysnes-lag i aksjon i helga. For Jenter 16-laget blei det ein jubeldag då dei reiste til Askøy for å møta Askøy 2.

– Det var ei kjekk oppleving, og jentene spelte ein veldig god kamp. Me spelte som alltid godt i forsvar, og no sat angrepsspelet også, fortel Austvik, som også er trenar for J16.

Tysnesingane vann heile 29-18, og mange kom seg på scoringslista.

– Det var kjekt å sjå at fleire melde seg på og fek seg nokre mål. Det var eit par stykk det løsna for, fortel trenaren.

Damelaget var også i aksjon i helga. Laurdag fekk dei med set eitt poeng borte mot Kleppestø, i ein målrik kamp som enda 29-29.




MÅLVAKTSHELT: Heile laget flokka seg kring keeper Isarlin Cristal Nødland då sigeren var i boks.
MÅLVAKTSHELT: Heile laget flokka seg kring keeper Isarlin Cristal Nødland då sigeren var i boks.
TØFFE TAK: Det blei mykje duellar i kampen mellom to gode forsvarslag.
TØFFE TAK: Det blei mykje duellar i kampen mellom to gode forsvarslag.
KONTRING: Ingvil Vermedal scora to mål, mellom anna eitt etter ein kontring.
KONTRING: Ingvil Vermedal scora to mål, mellom anna eitt etter ein kontring.
GOD KAMP: Louise Vermedal Lunde leverte ein god kamp på kanten.
GOD KAMP: Louise Vermedal Lunde leverte ein god kamp på kanten.
MUR: Askøy blei stoppa av Tysnes-muren i Tysneshallen laurdag.
MUR: Askøy blei stoppa av Tysnes-muren i Tysneshallen laurdag.
SKOT: Milena Titoka prøvde skotarmen med eit par høve.
SKOT: Milena Titoka prøvde skotarmen med eit par høve.
SIRKEL: Etter kampen samla laget seg i sirkel for eit sigersrop.
SIRKEL: Etter kampen samla laget seg i sirkel for eit sigersrop.

Siste saker Gå til framsida

Frå tømrar til byggingeniør

Sindre Økland starta yrkeslivet som fagutdanna tømrar, før han forsette med ei teoretisk utdanning og enda opp som byggingeniør.

Leiar: Nytt veterinærkontor er gladnytt for Tysnes

Måndag var det offisiell opning av det nye veterinærkontoret på Tysnes. Det er godt nytt for lokalsamfunnet Tysnes. Å ha eit lokalt veterinærkontor i kommunen som også er eit smådyrkontor, har lenge vore eit sakn. Det er positivt at ein har veterinærar som vågar å satsa på dette. Så får me berre håpa at det nye...