NYE LOKALE: Jan Egil A. Skarvatun fortel at dei nye lokala i Våge blir hovudlageret for Skarvatun VVS.
NYE LOKALE: Jan Egil A. Skarvatun fortel at dei nye lokala i Våge blir hovudlageret for Skarvatun VVS.

– Arbeidskvardagen blir enklare

Røyrleggjarbedrifta Skarvatun VVS jobbar med å gjera klart lager og kontor i Våge.
Publisert 03.02.2020 kl. 06.00.

– Dette blir hovudlageret vårt, fortel Jan Egil A. Skarvatun, som er dagleg leiar i Skarvatun VVS.

1. september i fjor tok røyrleggjarbedrifta over nye lokale sentralt i Våge. Dei siste månadene har det vore mykje aktivitet for å gjera lokala om til lager og kontor.

– Akkurat no jobbar me med å dela opp slik at me får eitt lagerrom med varme og eitt utan varme. Og så skal me få på plass eit lunsjrom og kontor, seier Skarvatun.


Praktisk

Skarvatun VVS kjem opphaveleg frå Ølve, og skal framleis ha lager og kontor der. Men den daglege leiaren fortel at lokala i Våge blir hovudlageret til bedrifta, og at dei skal skifta både kontor- og forretningsadresse.

– Det er to grunnar til at me gjer dette. For det fyrste så er det på Tysnes me har mesteparten av arbeidet vårt, forklarar han.

– I tillegg bur eg sjølv på Os, og då blir det meir praktisk for meg å ha Våge som utgangspunkt, seier han vidare.

Bedrifta har mange arbeidsoppdrag på begge sider av Lukksundet, men Skarvatun fortel at 80 prosent av oppdraga er på Tysnes.

– Arbeidskvardagen blir enklare og meir effektiv sidan eg ikkje må til Ølve for å henta utstyr, seier han.


Tre tilsette

Skarvatun starta opp bedrifta i 2015, og har i dag tre tilsette. Den daglege leiaren fortel at dei både har oppdrag for privatkundar, næringsliv og i samarbeid med lokale entreprenørar.

– Me samarbeider mellom anna med Andersland Bygg og Tysnes Bolig.

Han skryter av utviklinga som er, og har vore på Tysnes.

– Det har skjedd mykje på Tysnes i mange år. Det er veldig kjekt å sjå kva dei får til her. Det er bygder med veldig utvikling, seier Skarvatun.

Han fortel at dei har mykje arbeid for tida. Dermed kjem arbeidet med å klargjera dei nye lokala i Våge innimellom det vanlege røyrleggjararbeidet.

– Me har det såpass travelt at me må ta det litt etter litt. Men me har allereie begynt å bruka lokala som lager. Me satsar på å få alt klart til påske, seier han.


Siste saker Gå til framsida

Frå tømrar til byggingeniør

Sindre Økland starta yrkeslivet som fagutdanna tømrar, før han forsette med ei teoretisk utdanning og enda opp som byggingeniør.

Leiar: Nytt veterinærkontor er gladnytt for Tysnes

Måndag var det offisiell opning av det nye veterinærkontoret på Tysnes. Det er godt nytt for lokalsamfunnet Tysnes. Å ha eit lokalt veterinærkontor i kommunen som også er eit smådyrkontor, har lenge vore eit sakn. Det er positivt at ein har veterinærar som vågar å satsa på dette. Så får me berre håpa at det nye...