STORSPELTE I HOVUDSALEN: Tysnes Musikklag drog full nytte av den gode akustikken i «storstova» i Grieghallen, og imponerte med eit vanskeleg nummer. (Foto: Randi Kleppe)
STORSPELTE I HOVUDSALEN: Tysnes Musikklag drog full nytte av den gode akustikken i «storstova» i Grieghallen, og imponerte med eit vanskeleg nummer. (Foto: Randi Kleppe)

Godt nøgde med eigen innsats

Tysnes Musikklag kunne med rette seia seg nøgde, etter ei imponerande framføring i Grieghallen i føremiddag.
Publisert 07.02.2020 kl. 14.45. Oppdatert kl. 14.56.

NM brass tok til i dag, og Tysnes Musikklag – som spelar i 2. divisjon – entra scenen i Griegsalen om lag klokka elleve. Dei spelte det vanskelege stykket «Excalibur (Sword of Justice)», komponert av Jan van de Roost.

– Det har vore fem forholdsvis intense veker med øving. Det har ikkje alltid vore så bra, men i dag var det bra klaff. Så no er eg lykkeleg. Det var mykje positiv energi, og eg er fornøgd med innsatsen, smiler Yngve Nikolaisen etter endt framføring.

– Har de noko mål, med tanke på plassering?

– Me håpar kvart år å sleppa å rykka ned, for det er så kjekt å spela i Griegsalen, seier dirigenten.


Bit frå seg i 2. divisjon

Yngve legg ikkje skjul på at han synest det er stor stas å få spela i hovudsalen, der akustikken er langt betre enn i den mindre Peer Gynt-salen, der dei lågare divisjonane spelar.

– Dette er fjerde året på rad der me spelar i 2. divisjon. Dei andre åra har me komme på 8., 7. og 6. plass, så ut i frå dét skal me komma på 5. plass i år – noko som ikkje kjem til å skje, seier han spøkefullt.

Det fysisk tunge stykket dei spelte vart komponert i 1997, og er inspirert av den magiske atmosfæren kring sverdet til Kong Arthur – Excalibur.

– Det var eit nytt stykke for oss i år, fortel Yngve.


Stolt formann

Formann i musikklaget, Lars Petter Epland, er stolt over kva dei har fått til.

– Me er ordentlig fornøgde, både med spelinga og med reaksjonen me fekk etterpå. Dei fleste eg har snakka med har vore fornøgde. Me var spente på førehand, for me valde eit vanskeleg nummer. Men det er imponerande at vesle Tysnes kan få til noko sånt, fortel veteranen, som har vore med på NM brass heile 31 gongar – alle dei åra det har vore arrangert.

Lang erfaring har lært han at det er spelinga og det å ha det morosamt som er det viktigaste.

– Resultatet er gløymd på tysdag, seier han med eit smil.

– Men viss me greier å stabilisera oss midt i 2. divisjon, så er det bra. Men det er det å spela i Griegsalen som er det viktige, poengterer han.

NM brass held fram i dag og i morgon, og vert avslutta med premieutdeling laurdag kveld.

Meir om denne saka kan du lesa i «Tysnes» på torsdag.


Siste saker Gå til framsida

Frå tømrar til byggingeniør

Sindre Økland starta yrkeslivet som fagutdanna tømrar, før han forsette med ei teoretisk utdanning og enda opp som byggingeniør.

Leiar: Nytt veterinærkontor er gladnytt for Tysnes

Måndag var det offisiell opning av det nye veterinærkontoret på Tysnes. Det er godt nytt for lokalsamfunnet Tysnes. Å ha eit lokalt veterinærkontor i kommunen som også er eit smådyrkontor, har lenge vore eit sakn. Det er positivt at ein har veterinærar som vågar å satsa på dette. Så får me berre håpa at det nye...