EIN NY START: Tysnes-katten Jiff treng no ein fosterheim, der ho kan bli meir van til menneske. Enn så lenge likar ho ikkje når tobeinte nærmar seg. (Foto: Dyrebeskyttelsen)
EIN NY START: Tysnes-katten Jiff treng no ein fosterheim, der ho kan bli meir van til menneske. Enn så lenge likar ho ikkje når tobeinte nærmar seg. (Foto: Dyrebeskyttelsen)

– Kvart einaste liv er like verdifullt

Dyrebeskyttelsen har hendene fulle med eigarlause kattar. Ein av dei er Jiff, som gjekk rundt på Tysnes med knekt fot.
Publisert 08.02.2020 kl. 15.00.

Det var i november i fjor at det blei observert ein katt i dårleg forfatning ved Beltestad. Den slepte den eine bakfoten etter seg, og var både tynn, svolten og redd. Ingen eigarar melde seg då bekymra forbipasserande la ut eit Facebook-innlegg om katten, men til alt hell var frivillige frå Dyrebeskyttelsen på Tysnes, og kunne rykka ut med bur og lokkemat.

– Me veit ikkje kor langt ho kunne gått før ho ikkje hadde orka meir, seier Inger-Johanne Graff, leiar i Dyrebeskyttelsen Norge avdeling Bergen og Hordaland.


Pengeinnsamling og operasjon

Etter at katten var fanga inn bar det til veterinær, der røntgenbileta ikkje overraskande viste knekt fot. Brotet såg noko gamalt ut, og ein mistenkjer difor at katten kan ha gått med smerter over lengre tid. Kanskje har den hatt eit ublidt møte med eit køyretøy, men det vil ein aldri vita sikkert.

Ein kostbar operasjon måtte til, og det blei starta innsamlingsaksjon for den uheldige pusen, som fekk namnet Jiff. Dyreklinikken Tertnes opna opp foten og lappa beinendane saman med både plate og skruer, og på ein etterkontroll sist veke kunne veterinæren heldigvis konstatera at alt såg bra ut.


Redd for menneske

Jiff er ein ung jentepus, truleg under eitt år gamal. Ho er framleis under Dyrebeskyttelsen sine venger, og bur i Dyrenes Hus på Tertnes. No er håpet at ho skal få seg ein fosterheim, der ho kan få tillit til menneske. Å få ein katt som har levt åleine ute til å bli eit kjærleg familiemedlem er ikkje enkelt, men fullt mogeleg. Og Dyrebeskyttelsen spår ei lys framtid for Jiff.

– Ho er berre skjønn. Liten av vekst, og utruleg vakker. Me veit at det kjem til å gå bra med henne, seier Graff optimistisk.


– Me gir aldri opp

No ligg alt til rette for at Jiff skal få eit godt katteliv vidare, men ikkje alle er like heldige som henne. Både på Tysnes og andre stader lever det mange kattar utan eigar, med dei utfordringane det fører med seg. Både Dyrebeskyttelsen og andre dyrevernsorganisasjonar er nedleste i arbeid, og må heile tida gjera vurderingar på kva dyr det hastar mest å hjelpa.

– Skulle me ha teke imot alle, hadde me hatt 5-6.000 kattar og kunne ha opna Grieghallen, slår Graff fast.

Det er med andre ord ein kamp dei ikkje kan vinna fullt og heilt, men ho misser ikkje motet av den grunn.

– Me veit at det nyttar, og difor gir me aldri opp. Kvart einaste liv er like verdifullt for oss, seier den engasjerte dyrevennen.


Viktig å kastrera

Haldninga «det er berre ein katt» er framleis veldig vanleg. Mange let difor vera å bruka pengar på kastrering, og tenkjer kanskje ikkje over kor mykje elende det kan føra til. Har du til dømes ein ukastrert hannkatt som parar seg med ein eigarlaus hokatt, kan det raskt bli til svært mange kattar som er overlatne til seg sjølve. I neste omgang er katteaids, skader etter slåssing og matmangel problem som ofte oppstår.

– Ta ansvar for dyra dine. Ta eingongskostnaden med kastrering og chip. Dette bør gå inn i hjarto på folk, seier Graff. Ho vil også minna om at ein har hjelpeplikt dersom ein observerer ein katt som lir.

– Få det på Facebook, eller snakk med naboen. På nettsidene våre finn ein meir info om kva ein skal gjera i ein slik situasjon, sluttar Graff, med eit håp om at fleire får augo opp for katten sin verdi.


Siste saker Gå til framsida