SNART I LAMMETÅKE: Karin Brekke viser stolt fram det fyrste lammet, som har fått namnet Snøhvit. No ventar ein travel periode på garden. (Foto: Privat)
SNART I LAMMETÅKE: Karin Brekke viser stolt fram det fyrste lammet, som har fått namnet Snøhvit. No ventar ein travel periode på garden. (Foto: Privat)

Det fyrste lammet på Tysnes i år?

På Brekke gard i Uggdalsdalen kom vesle Snøhvit til verda allereie 24. januar.
Publisert 10.02.2020 kl. 14.24. Oppdatert kl. 15.13.

– Ho hoppar rundt og er blitt stor og «fantete», seier Karin Brekke om lammet som blei fødd for snart tre veker sidan.

Sist tysdag såg også lam nummer to dagens ljos, og framover vil det gå slag i slag for Karin og mannen Lars Kristian Brekke. Dei ynskjer å gjera seg tidleg ferdig med lamminga i år, og det var difor bevisst at væren fekk sleppa tidleg til.

– Me har bestemt oss for å prøva noko nytt. No vil lamma bli ganske store før me har dei på beite, fortel Karin.

Ho forklarar at dei har vore plaga med rev, og håpar at lamma i år vil ha betre føresetnadar for å klara seg, sidan dei er større når dei skal ut på bakkane.

– Eg har ei kjensle av at det kjem til å gå bra seier ho.

Karin og Lars Kristian gler seg til den travle perioden som så smått er i gang.

– Lamminga er ei glede. Me håpar på store lam og fint vêr, seier ho forventningsfullt.

Totalt har dei om lag 60 søyer som skal lamma.


Siste saker Gå til framsida