NYTT EKSTREMVÊR: I januar fekk fleire naust kjenna på floa. I natt kan vasstanden bli endå høgare. (Arkivfoto: Camilla Korsnes)
NYTT EKSTREMVÊR: I januar fekk fleire naust kjenna på floa. I natt kan vasstanden bli endå høgare. (Arkivfoto: Camilla Korsnes)

Ventar høgare flo enn sist

Meteorologisk institutt har sendt ut raudt farevarsel.
Publisert 10.02.2020 kl. 10.17. Oppdatert kl. 10.24.

I midten av januar førte ekstremvêret «Didrik» med seg høg flo til kysten av Vestlandet, og fleire stader på Tysnes steig sjøen over kaikantar og opp langs naustvegger.

No er det eit nytt ekstremvêr, med namnet «Elsa», som herjar, og meteorologane melder at vatnet kan stiga endå høgare enn i januar. For tidsrommet 22.00 måndag kveld til 02.00 natt til tysdag er det sendt ut raudt farevarsel om ekstrem høg vasstand. Floa skal nå toppen like før midnatt, og ifølgje Kartverket sin nettstad sehavniva.no kan vasstanden i Våge stiga 89 centimeter over normalt tidevassnivå, som tilsvarar 219 centimeter over sjøkartnull. Det er meir enn 20 centimeter høgare enn det var meldt på det høgaste i januar.

Meteorologane ber folk vera forsiktige.

– Unngå ferdsel i strandsona, skriv meteorologisk institutt i farevarselet.

Folk blir også bedne om å vurdera å ta båten på land, og sikra lause gjenstandar i naust og strandsona.

Også på Onarheim er det venta høg vasstand natt til tysdag. Også her kan vasstanden nå 89 centimeter over normalen i tidevasstabellen, som tilsvarar 212 centimeter over sjøkartnull.

Det er i tillegg sendt ut oransje farevarsel for tidsperioden 10.00 til 14.00 både måndag og tysdag. Då er vatnet venta å stiga kring 55 centimeter over normal tidevasstand.


Siste saker Gå til framsida

Leiar: Nytt veterinærkontor er gladnytt for Tysnes

Måndag var det offisiell opning av det nye veterinærkontoret på Tysnes. Det er godt nytt for lokalsamfunnet Tysnes. Å ha eit lokalt veterinærkontor i kommunen som også er eit smådyrkontor, har lenge vore eit sakn. Det er positivt at ein har veterinærar som vågar å satsa på dette. Så får me berre håpa at det nye...