STOR PRESTASJON: Pernilla Eugenie Epland (t.h.) var strålande nøgd med å klara EM-kravet på halvmaraton. Vienna Dahle (t.v.) var den andre norske jenta som også klarte EM-kravet i same løp. (Foto: Privat)
STOR PRESTASJON: Pernilla Eugenie Epland (t.h.) var strålande nøgd med å klara EM-kravet på halvmaraton. Vienna Dahle (t.v.) var den andre norske jenta som også klarte EM-kravet i same løp. (Foto: Privat)

Superløp kan ha sikra EM-plassen

Pernilla Eugenie Epland opna sesongen med å klara EM-kravet på halvmaraton.
Publisert 20.02.2020 kl. 16.00.

– Det var ei lette, fortel Pernilla Eugenie Epland.

I sommar er det europameisterskap i friidrett i Paris, og målet til Pernilla er å koma seg dit. Søndag var ho i Barcelona for hennar fyrste løp i år, og på fyrste forsøk for sesongen smadra ho EM-kravet på halvmaraton.

– Det er heilt fantastisk å klara det på fyrste forsøk, fortel løpedronninga.


Superløp

EM-kravet på halvmaraton er 1.13,30, og før løpet i Barcelona var Pernilla sin personlege rekord på 1.14,34. Dermed måtte ho løpa klart fortare enn nokon gong for å klara kravet. Det klarte Pernilla, som sprang i mål på tida 1.13,10, 20 sekunder raskare enn EM-kravet.

– Eg var så glad for å klara EM-kravet, at eg nesten gløymde at eg persa med nesten eitt og eit halvt minutt, fortel ho.

Pernilla følte at ho verkeleg hadde dagen, og skjønte etter kvart i løpet kva veg det kom til å gå. Ho og trenar Nils Hetleflåt hadde på førehand diskutert moglegheita for å klara kravet.

– Me prata om at viss eg passerte 20 kilometer på 1.09,40, så kom eg til å klara kravet. Eg skjønte at dette kunne eg klara då eg passerte på 1.09,36.


Så å seia EM-klar

Den gode tida betyr at Pernilla sannsynlegvis kan førebu seg på tur til Paris og europameisterskapen i august. Turen er likevel ikkje heilt sikra.

– Det har i utgangspunktet blitt sagt at dersom ein klarar kravet, så får ein reisa til EM, fortel Pernilla.

Derimot kan Norge berre ta ut tre utøvarar til kvar øving. Dermed kan det bli kamp om plassane dersom fleire enn tre klarar kravet.

– Me er to stykk som har klart kravet no, og eg trur det er to til som kan klara det, forklarar løparen, som likevel er positiv med tanke på eiga deltaking.

– No har eg gjort min jobb. Eg skal sjølvsagt ikkje ta noko på førehand, men eg trur nok ganske sikkert at det blir Paris i august, fortel ho.


Målretta

Å koma seg til EM i sommar har vore det store målet til Pernilla, og ho har jobba målretta for det den siste tida. Blant anna har ho vore tre veker på treningsleir i Sør-Afrika.

– Det er andre året på rad eg har vore i Sør-Afrika, fortel ho.

Medan ho var der to veker i fjor, utvida ho opphaldet til tre veker i år. Treningsleiren i Sør-Afrika er eit høgdeopphald, der ho bur og trenar kring 2.000 meter over havet.

– Det var veldig godt å få ei ekstra veke. Ein bruker uansett fyrste veka til bli van med høgda.

Treningsleiren var ein del av eit skreddarsydd opplegg inn mot sesongen, og Pernilla fortel at oppkøyringa har vore suksessfull.

– Alt gjekk veldig bra i Sør-Afrika. Det er lite som kunne blitt gjort betre, seier ho.

At ho i år går all-in for å koma til EM, gjer også at ho prioriterer ned andre løp, mellom anna innandørs-NM som gjekk i starten av februar.

– Det var viktigare å klara eit EM-krav, seier Pernilla tydeleg.


Vil prøva fleire distansar

Resultatet i helga gjer at Pernilla er kvalifisert for halvmaraton i EM, men ho slår seg ikkje til ro med det. Pernilla vil gjerne løpa fleire distansar i europameisterskapen.

– No går eg inn i ein vanleg banesesong. Eg har veldig lyst til å prøva å klara kravet både på 5.000- og 10.000-meter, og eg har fleire forsøk på å klara det.

Sjølv om ho skulle klara kravet på nokre av desse distansane, kan det likevel bli meir kamp om plassane for å få løpa i Paris.

– Det er to ledige plassar på 5.000, men me er ein del jenter som kan klara kravet.

På 10.000-meteren er det potensielt berre éin ledig plass på laget. Både Karoline Bjerkeli Grøvdal og Therese Johaug har klart kravet og er i utgangspunktet kvalifiserte for å få løpa.

Pernilla må forbetra sine personlege rekordar på begge desse distansane viss det skal bli EM-plass, og ho trur ho kan ha gode moglegheiter til å få det til.

– På 5.000 har eg pers på 16.11, og kravet er på 15.50. Resultatet på halvmaratonen i helga indikerer at eg skal kunna klara å forbetra meg såpass. Viss eg fortset å få trent bra, og ikkje får nokre skadar eller sjukdom, så har eg trua, fortel ho.


Tilbake frå skade

Dette året blir berre det fjerde året ho satsar som langdistanseløpar, og det har stort sett heile vegen vore ei bratt utviklingskurve, sjølv om ting stoppa litt opp i fjor. I august fekk ho bronse på 5.000 i NM, før ho måtte trekka seg frå både 10.000-meteren og påfølgjande EM for lag grunna skade. No er ho skadefri og utviklingskurva har på nytt skote fart.

– Eg hadde ei muskulær overbelasting, så løysinga var å roa ned på treninga. Då hadde me tolmodet som skulle til, og det var i grunnen eit godt tidspunkt å få det på, då eg fyrst fekk overbelastinga, fortel ho.

– Trudde du på førehand at du skulle klara EM-kravet allereie no i fyrste løpet i år?

– Hadde du spurt meg på seinsommaren, hadde eg vore meir usikker. Men då eg vann 3-sjøersløpet i november og fekk ein god periode med grunnopptrening i vinter, fekk eg meir og meir trua.

Ho har også eitt halvmaratonløp igjen i vår. Sjølv om ho allereie har klart kravet, tar ho gjerne med seg endå ei forbetring av tida. Det vil også auka sjansane for EM-start dersom fleire enn tre kvinner klarar kravet.

– Eg merkar jo at eg har veldig lyst å koma meg ned på 1.12-talet, seier ho.


Gler seg til Frankrike

Dersom ting blir som forventa, ser Pernilla stort på å få delta i EM.

– Korleis ville det blitt å få representera både Norge og Tysnes i EM? – Det blir veldig kjekt, og det blir sikkert ein del familie og vener som reiser ned, fortel ho.

Det er ingen tvil om at EM-deltaking vil bli det største høgdepunktet i karrieren hennar.

– Det var kjipt å mista lag-EM i haust, men dette blir heilt klart det største, til no. Eg gler meg veldig, avsluttar ho.


Siste saker Gå til framsida

Debatt: Tysnes KrF prioriterer Hordfast

Naturvernforbundet (NVF) på Stord har sendt brev til dei politiske partia i Stord og Tysnes. Dei ber partia gje tilsvar om partia si haldning til Hordfast. Høgre i Tysnes har gjeve eit grundig tilsvar i «Tysnes» 2.4.20. Tysnes KrF sluttar seg i...

Gå Hakkebakkestien på Neshamn

Leitar familien etter ein ny aktivitet? Er alle dei vanlege turstiane oppbrukt? Då kan kanskje Hakkebakkestien til Karianne på Neshamn vera interessant.