FINT SKIFØRE: - Ta med kakao og niste og nyt laurdag føremiddag i skianlegget, oppmodar Steinar Rosset.
FINT SKIFØRE: - Ta med kakao og niste og nyt laurdag føremiddag i skianlegget, oppmodar Steinar Rosset.

– Ta turen til fjells tidleg laurdag føremiddag

Steinar Rosset er ein av dei som tok turen i skianlegget i Solheimsdalen fredag. No oppmodar han folk å ta turen laurdag.
Publisert 28.02.2020 kl. 20.31.

– Det er veldig fine forhold. Eg har gått femten rundar i anlegget, seier Steinar Rosset då «Tysnes» møter han seint fredag ettermiddag.

No oppmodar Steinar Rosset folk om å ta turen til fjells tidleg laurdag føremiddag. Han har studert vermeldinga. Det blir finast tidleg laurdag. Utover dagen skal vinden ta seg kraftig opp.

– Folk må pakka sekken i kveld og gjera seg klare, og ta med seg niste og kakao og nyta føremiddagen i skianlegget, oppmodar Rosset.

Fredag var det fine og nypreparerte løyper i skianlegget. Leiar i Onarheim IL, Morten Nordal, var tidleg på plass med snøscooteren for å pakka traseen og køyra opp spor.

– Det var bra med nysnø i dag. Eg målte 18 centimeter på terrassen utanfor varmestova i 08.30-tida, fortel Morten Nordal.

Han fortel at det vil bli køyrt opp spor tidleg laurdag dersom det kjem meir snø i natt.

– Me får håpa det blir snø og sludd som kjem som nedbør i området i helga. Då kan det bli fine skiforhold også i neste veke, seier Steinar Rosset.


Siste saker Gå til framsida