TRIPPELSIGER: Jenter 13 var eit av tre Tysnes-lag som sigra i Tysneshallen søndag. (Arkivfoto)
TRIPPELSIGER: Jenter 13 var eit av tre Tysnes-lag som sigra i Tysneshallen søndag. (Arkivfoto)

Tre sigrar og eitt tap

Heile fire Tysnes-lag var i aksjon i Tysneshallen søndag, og heimepublikummet fekk mykje å gleda seg over.
Publisert 11.03.2020 kl. 08.54.

Etter ein handballfri vinterferie, var Tysnes-laga på nytt i aksjon i helga. Søndag var det eit tett program i Tysneshallen, med heile fire lag i aksjon. For J15-laget blei det dessverre tap, medan damelaget, J13 og J12 kjempa til seg tre sterke heimesigrar.

Det var Jenter 15 som var fyrst i aksjon. Dei møtte Bønes 2, som er eit av dei to topplaga i avdelinga, og tysnesingane fekk det tøft. Spesielt tøft var det i starten av kampen. Etter ti spelte minutt leia nemleg bortelaget 0-6. I det 12. minutt sette Brita Austvik inn tysnesingane sitt fyrste mål, og derifrå og ut var kampen temmeleg jamspelt. Bortelaget leia 4-9 til pause, og sluttresultatet blei 14-21.

Austvik blei soleklart toppscorar for heimelaget med ni mål. Også Elise Vermedal, Hanna Langballa, Annica Reimdal Vee og Malin Dalland teikna seg på scoringslista for Tysnes.


Kjempar om serietittel

Tysnes sitt Jenter 12-lag har hatt ein strålande sesong, og kjempar heilt i toppen i si avdeling. Søndag tok dei imot ein tøff motstandar i Bjarg 4 til dyst i Tysneshallen.

J12 har berre tapt éin kamp denne sesongen, og den statistikken stod seg også mot gjengen frå Bjarg, sjølv om det var bortelaget som opna best. Med fire minutt igjen av fyrste omgang leia dei nemleg 1-4.

Etter ein time-out snudde derimot trenden, og tysnesingane kom knallsterkt inn i kampen igjen. Til pause låg Bjarg berre eitt mål framfor Tysnes, og andre omgang var ikkje gamal då heimelaget hadde snudd kampen. Tysnes-jentene var overlegne i andre omgang med ti mål mot Bjarg sine tre. Tysnes vann til slutt 14-8. Toppscorar for heimelaget blei Yosan Ngusse med fem mål.

Jenter 12-laget klatra dermed til andreplass på tabellen, med like mange poeng som serieleiarane Årstad 3, samt Bergen 3 som ligg på tredjeplass. Medan Bergen 3 har spelt alle sine 15 kampar denne sesongen, har dei to laga på toppen to kampar igjen å spela. Laga frå fjerdeplass og nedover ligg for langt bak til å ta igjen topplaga, som dermed gjer at Tysnes er sikra topp to i avdelinga. Det betyr at dei er klare for fylkesmeisterskapen etter sesongslutt.

J12 avsluttar sesongen neste helg med to bortekampar mot Fyllingen 2 og Lyngbø.


Fyrste siger i 2020

Den tredje kampen søndag var mellom damelaget til Tysnes IL og sunnhordlandsrivalane Kvinnherad. Heimelaget har hatt fleire solide kampar dei siste månadane, men med lita poengmessig utteljing. Derimot klarte dei å kjempa til seg to uavgjort på rad mot Bønes 2 og Kleppestø, før det blei tap mot Bergen 2 i førre kamp. Mot Kvinnherad slo dei tilbake, og fekk sin fyrste siger i 2020.

Som i dei føregåande kampane fekk også bortelaget den beste starten i dette oppgjeret, og leia med fire mål til pause. I andre omgang var tysnesingane klart best, og dei siste 20 minutta handla alt om heimelaget. Tysnes scora 17 mål i andre omgang, og vann til slutt kampen med siffera 23-17. Mange spelarar teikna seg på scoringslista, og Maria Lillesletten Hagen, Sara Reimdal Vee og Renathe Hagen-Lunde blei delte toppscorar med fire mål kvar. Signe Pettersen Opdal, Mia Jensen Nes og Linda Flornes scora tre mål kvar, medan Julie Bakke scora to mål.

Damelaget har tre kampar igjen av sesongen. To bortekampar mot Sandviken og BSI 3, og éin heimekamp mot Kleppestø. Alle tre er overkommelege motstandarar, og tysnesingane har dermed gode moglegheiter til å plukka fleire poeng i dei siste rundane.


Kjempa seg til siger

Kampen mellom Tysnes sitt Jenter 13-lag og Bjørnar blei den jamnaste kampen søndag. Laga følgde kvarandre frå start til slutt, og det var heimelaget som trekte det lengste strået ved fulltid. Alma Vermedal scora åtte mål, og blei med det Tysnes sin viktigaste spelar offensivt. Ho blei også matchvinnar med dei to avgjerande måla i kampen.

Bortelaget leia nemleg 11-12 då det stod att eitt og eit halvt minutt av kampen. Då fekk Tysnes fyrst eit straffekast som Vermedal sette i mål, før ho sette sigersmålet med tolv sekund igjen av kampen. Sluttresultatet blei dermed 13-12 til Tysnes.

Tysnesingane ligg midt på tabellen, jamt med fleire andre lag. Dei har to kampar igjen av sesongen, og med full utteljing kan dei kjempa om tredjeplassen i avdelinga. Allereie fyrstkomande søndag skal dei på nytt i aksjon heime i Tysneshallen når Sotra kjem på besøk.


Siste saker Gå til framsida