LOFOTSKREI: Fiskar Erlend Matre er storfornøgd med årets Lofotfiske.
LOFOTSKREI: Fiskar Erlend Matre er storfornøgd med årets Lofotfiske.

Erlend med storfangst av sei og skrei i Lofoten

175 tonn fisk drog Erlend Matre (33) og to kollegaer opp ved Lofoten. Dei kom heim med «Austbris» til Flakkavågen seint søndag kveld, etter å ha fiska opp kvotane.
Publisert 21.03.2020 kl. 06.00.

Lofotfisket er noko av det aller viktigaste for svært mange fiskarar. Erlend Matre driv Matre Fiskeriselskap, og var i Lofoten for tredje året på rad. Han hadde to tilsette med seg, og dei er svært godt fornøgde etter å ha fiska der to periodar etter nyttår.

– Me reiste først opp 3. januar og fiska med garn til 8. februar. Me let båten vår, «Austbris» på 50 fot, liggja att i Lofoten. Etter to veker heime reiste me opp att, og har no vore på båten sidan 22. februar.

– Det er skreifiske, altså torskefiske, som er mest kjend i samband med Lofotfiske?

– Ja, det er nok det, og me fiska full kvote på 78 tonn med skrei. Skreien er stor torsk som gyt i Lofotenområdet og vandrar til Barentshavet og tilbake. Det vart eit ganske effektivt fiske for oss. Me kunne få opptil åtte tonn på ein dag og gjekk berre ein halvtime frå land for å setja garna. No i februar og mars leverte me i land i Stamsund.


Også sei

Erlend Matre og kollegaene Lars Fitjar Waage og Arnt Sturle Wiik var effektive medan dei var nordover.

– Ja, me drog opp mykje sei og, faktisk meir enn skrei. 100 tonn sei leverte me. Det var tre-fire timar å gå med båten ut til feltet og like langt til land igjen for å levera, så det kunne bli lange dagar. Me fekk også litt kveite og brosme. Til saman har me på desse vekene fiska 175 tonn fisk. Då hadde me fått så mykje som me har lov til, og me er svært godt fornøgde, seier Erlend Matre, som tidleg bestemte seg for å bli fiskar.


Korona

Dei strenge restriksjonane i samband med korona-viruset var ikkje sette i verk då dei forlet Stamsund sist veke, men dei merka at noko var på gang.

– Ja, me plar jo gå opp på kontoret ved fiskemottaket for å skriva under på fangstsetelen. Men siste gongane ville dei ikkje ha oss inn der, og me signerte berre på mail, seier Erlend Matre, og er glad for at Lofotfisket kunne gå som planlagt.


God pris

Det har variert år for år kor bra dei har fått betalt for skreien, men i år er topp-år slik sett.

– Prisen var kjempegod. Me fekk 24 kroner kiloet for rund fisk, seier fiskaren, som også hadde mange kilo skrei om bord i «Austbris» då han og mannskapet la til kai i Flakkavågen.

– Då me gjekk inn og leverte skrei for siste gong, sette me litt garn ute på feltet for å kunna få opp litt skrei me kunne ha med oss og eta på turen sørover. Men då fekk me langt meir enn me hadde rekna med, så det er ikkje vanskeleg å finna ut kva me skal ha til middag framover no, smiler Erlend Matre.


Skreioppskrift

Også journalisten fekk med seg skrei frå lofotfiskaren. Og er du så heldig å få tak i skrei, eller annan torsk, så kan eg tilrå å laga han til slik eg gjorde:

Skjer bacon i bitar som du steikjer lenge på svak varme. Så skjer du opp purrelauk og raud paprika som du også steikjer lett og blandar med baconet. Potetene set du på kok. Skreien saltar du litt i 15 minutt, før du med papirhandkle turkar bort litt av saltet. Så peprar du litt og steikjer skreien med skinnet på, om lag fem minutt på kvar side. God middag!


LEVERING: Dei var dagleg innom fiskemottaket i Stamsund. (Foto: Erlend Matre)
LEVERING: Dei var dagleg innom fiskemottaket i Stamsund. (Foto: Erlend Matre)
BASE I FLAKKAVÅGEN: «Austbris» på 50 fot har vore i Lofoten heilt sidan 3. januar.
BASE I FLAKKAVÅGEN: «Austbris» på 50 fot har vore i Lofoten heilt sidan 3. januar.

Siste saker Gå til framsida