Bladet Tysnes er lokalavis for Tysnes kommune, utflytta tysnesingar og ferierande i Tysnes. «Tysnes» kjem ut ein gong i veka og har eit godkjent opplagstal på 2445. I kommunen er det 2800 innbyggjarar, og 1500-1600 fritidsbustader.
Avisa har hatt ein jamn og fin vekst i fleire år. I desse dagar presenterer me ei ny utgåve av nettavisa vår, www.tysnesbladet.no.
Avisa held til i leigde lokale i kommunesenteret i Tysnes. Me er i dag seks tilsette, av desse er to journalistar.

Ledig stilling som

JOURNALIST

Ein av våre fast tilsette journalistar har sagt opp stillinga i «Tysnes». Me søkjer difor etter ein ny, fast medarbeidar.

Me ynskjer oss ein omgjengeleg, idérik og ansvarsfull person med godt humør og med sans for dei gode lokale sakene.

«Tysnes» har ein liten stab. Det vil difor vera høge krav til produktivitet. Du må kunna jobba raskt og sjølvstendig. Journalistar i «Tysnes» må kunna dekka det meste som skjer i lokalsamfunnet. Avisa skal spegla dagleglivet i kommunen. Det tyder at du den eine dagen kan vera på karneval i barnehagen. Den neste er du kanskje på fisketur, eller jobbar med ei viktig samferdslesak. Du kan bli sendt på kommunestyret for å dekka ei utbyggingssak, eller følgja kommunale møte på politisk dag. Næringslivssaker er eit anna viktig felt for avisa. Journalistane i «Tysnes» lagar også saker for nettavisa.

Me leitar aller helst etter ein person med journalistisk utdanning. Journalistisk erfaring kan kompensera for manglande utdanning. Det er også ynskjeleg med erfaring frå fotografering. Den som blir tilsett vil få høve til kurs og oppdatering.

Målforma i avisa er nynorsk. Det er eit vilkår at den nye journalisten enten bur i kommunen eller vil busetja seg i Tysnes. Vedkomande må disponera bil. Ein må rekna med ein del helgearbeid, med høve til avspasering.

Me vil oppfordra både kvinner og menn til å søkja.
Tilsetjingsdato etter nærare avtale.

Er du klar for nye utfordringar i ei lita og spennande lokalavis, send søknaden til:

Bladet Tysnes AS
v/redaktør Ole Skaten
5685 Uggdal

innan 8. mars