Vil kutta på rådhuset

Lønsutgiftene i kommunen må ned. Ei samling av tenestene på rådhuset kan verta løysinga for å kutta i talet på tilsette.

Omorganiseringa av rådhuset var ei av sakene som vart drøfta då formannskapet starta innsparingsdebatten i førre møte.

– Reduseringa av budsjettet må skje på fleire nivå, konstaterte ordførar Kjetil Hestad i debatten og heldt fram;

– Lønsutgifter er den desidert største utgiftsposten til kommunen, og me må verta færre tilsette. Omorganiseringa av rådhuset er ein lekk i dette arbeidet.

Vil kutta etatsjefstillingar

Det er rådmannen som har jobben med å sjå på organisasjonsutviklinga på rådhuset. Eitt av forslaga hans er å gå over frå ein tre nivå- eller etatsmodell til ein såkalla to nivå-modell for oppvekstetaten og helse og sosial. Denne modellen er kjenneteikna av at leiarane for dei utøvande tenestene rapporterer direkte til administrasjonssjef-nivået, utan eit mellomliggjande etatsjefsnivå.

– Kort sagt betyr det at ein tek vekk etatsjefsstillingane. Dette vil gje større fleksibilitet til å gjera etatsovergripande grep, kommenterte rådmann Roy-Sverre Amundsen i formannskapet.

Han konstaterte samstundes at administrasjonen i kommunen i dag i stor grad er desentralisert.

– Kvar etat har sine arkiv, sine postmottak og sine sekretæriat. Mange tilsette utfører mange av dei same oppgåvene, men ved kvar sine etatar, utdjupa Amundsen.

Vil spara mykje

Rådmannen meiner Tysnes vil tena mykje på å sentralisera fleire av desse funksjonane og oppretta eit sentralt arkiv og kundemottak.

– Fordelen for Tysnes er at kommunen har relativt få såkalla resultateiningar. Med tre-fire barnehager, to-tre skular og helse- og sosialtenestene vil det vera overkomeleg med ei slik organisering, meinte Amundsen.

Han la til at det vil vera pengar å spara på å gå over til ein to nivå-modell og at dette vil vera ein naturleg følgje av ei sentralisering av tenestene på rådhuset.

Rådmannen understreka samstundes at kommunen må syta for å organisera seg på ein fleksibel måte og antyda at ein «hybridmodell» kanskje kan vurderast.
Han føreslår også mellombels tilsetjingsstogg i kommunen. Det vil i så fall bety at ingen stillingar vert lyst ut i denne perioden.

Fekk gehør hjå politikarane

Tore Atle Humlevik (H) meinte innspela til rådmannen var fornuftige.

– Det er ei kjennsgjerning at ein del tilsette på rådhuset har meir å gjera enn andre. Alle gjer ein god jobb, men med ei slik organisering kan det verta større høve for å nytta dei tilsette der det er trong for det, kommenterte Humlevik.

Arne Skutlaberg (Sp) meinte også at fellesfunksjonar i staden for etatsfunksjonar høyrdest fornuftig ut. Han understreka samstundes at omorganiseringa må skje på ein smidig måte i tett dialog med dei tilsette.

– Det er viktig å unngå unødig frustrasjon, kommenterte Sp-politikaren.

Aud Kaldefoss (Krf) meinte ein tilsetjingsstogg kan vera fornuftig. Då føreset ho at det er snakk om å sjå kva ressursar ein rår over før ein eventuelt lyser ut nye stillingar.

Tankane om ei sentralisering av fleire av tenestene på rådhuset fall også i god jord hjå Frp.

– Musikk i mine øyre, kommenterte John Martin Dale og poengterte at Frp ved fleire høve har teke til orde for eit servicetorg i rådhuset.