Fylkesmannen bremsar utviklinga

Fylkesmannen i Hordaland kjem med heile 24 motsegn til forslaget til ny kommuneplan i Tysnes. Plansjef Asle Bernt Rekve er både skuffa og overraska.

Småbåthamner og spreidde bustadar i LNF-område er dei to punkta fylkesmannen har flest motsegner til.

– Det er dette som går att i fylkesmannen sin uttale og  som kanskje har mest å seia for Tysnes sin del, konstaterer plansjef i kommunen, Asle Bernt Rekve.

Han  er overraska og skuffa over talet på motsegner utifrå den prosessen kommunen har vore gjennom.

– Eg er skuffa over at det vert slik ut frå den jobben me har gjort. Me kutta talet på planføremål frå over 300 til 67, minnar Rekve om.

Vanskeleg å styra

I Uggdal krins er det lagt inn 18 nye planføremål i forslaget til ny arealdel i kommuneplanen. Det er i stor grad lagt opp til fortetting av utbygde område.

– Dette er ein god måte å utnytta arealet på, kommenterer fylkesmannen.

Men han er kritisk til dei tiltaka som er lagt inn i urørde område eller der det har store negative konsekvensar for landbruksinteressene.

For Reksteren sin del har kommunen uttrykt ynske om å sikra busetnaden, men fylkesmannen er kritisk til at «det er lagt ut svært store område til LNF-spreidd busetnad.

– Gjer ein det slik, er det vanskeleg å styra utviklinga for busetnaden, meiner han.

Våge sentrum

Fylkesmannen utfordrar også Tysnes kommune på planane for sentrum av Våge. Han påpeikar at det i planframlegget er lagt ut fleire planføremål som kjem i konflikt med dyrka mark. Fylkesmannen har difor motsegn til dei områda som ligg aust for Våge fordi han meiner det er riktig å fortetta nærmare sentrum. Han går også mot den planlagde småbåthamna i Gjersvika.

I Lunde er det hovudsakleg føreslege nye område for LNF-spreidd busetnad og to småbåthamner. Fylkesmannen meiner dei føreslegne tiltaka kan vera positive bidrag dersom det vert teke landskapsomsyn ved plassering av bygga.

På Onarheim er det lagt inn nye bustadområde, LNF-spreidd busetnad og naust. Det største planføremålet er på Hovland med fem nye bustader. Her har fylkesmannen motsegn til storleiken og utforminga av planføremålet fordi det har store konsekvensar for landbruksinteressene.

Vonar på dialog

Plansjef Asle Bernt Rekve kommenterer at det er for tidleg å seia noko om kor store konsekvensar dei mange motsegna vil få for gjennomførina av planane. Men han reknar med at kommunen kan få koma i dialog med fylkesmannen og drøfta i kva grad ein kan koma til semje om dei ulike punkta.

– Det kan nok verta både ein og to rundar med fylkesmannen før planen kjem opp til politisk handsaming.

Viss dialogen med fylkesmannen ikkje fører fram, må kommunen vurdera kor vidt ein vil gå til mekling, eller ta motsegna til etterretning.