«Bymann og bonde, velkomen til Londe»

Tysdag gjorde Lunde bygdelag stas på Sigvard Madsen og Tysnes Bolig for deira utvikling av bygdene. Med kake, flagg og gode ord, vart det ein koseleg lunch på Kattaland.

– Me vil ynskja Tysnes Bolig velkomen til Lunde. Det er den fyrste Tysnes Bolig-bustaden som vert sett opp her, og det set me stor pris på, seier nestleiar i Lunde bygdelag, Anne Merete Fjeldstad.

Saman med leiar i Lunde bygdelag, Knut Nesland og styremedlem Jan Belt, møtte ho opp på Kattaland og overraska Tysnes Bolig.

Medan Belt meinte heile seansen med flagg og velkomstkomité minna om Olsenbanden, var Madsen svært nøgd med merksemda.

– Dette var overraskande og koseleg. Og steike god kake, seier Madsen som saman med Trond Tvedt står bak Tysnes Bolig. Målet til selskapet er å tilby rimelege og gode husvære, og Lunde bygdelag meiner det er viktig å visa at dei set pris på Tysnes Bolig og arbeidet dei gjer.

– Det er flott at dei tør satsa på bustadbyggjing i bygdene. Denne firemanns-bustaden på Kattaland representerer slike bustader me vil ha her i Lunde. Me vonar sjølvsagt at dei set opp fleire bustader, seier Fjeldstad.

Og det er ikkje umogleg. For Madsen fortel at Tysnes Bolig har reservert to tomter til i Lunde.

– Her har me teikna noko heilt nytt. Folk vert vel snart lei av firemanns-bustadane våre, ler han.