Svensk popprinsesse til Tysnesfest

Radio- og kritikaryndlingen Veronica Maggio er klar for årets festival.

– Me er svært glade for at Veronica Maggio kjem til oss. Ho har blitt ein yndling på festivalstyret sine Spotify-lister, og me gler oss stort til å sjå ho live, kommenterer pressekontakt i Tysnesfest, Sigvard Madsen.

Han opplyser samstundes at Maggio opnar torsdagskvelden på hovudscena på Gjerstad. Den svenske artisten går på scena før danske Kim Larsen.

Tre Grammis

Veronica Maggio slo for alvor gjennom i 2008 med singelen «Måndagsbarn». I desse dagar er ho aktuell med albumet «Satan i gatan», som mellom anna inneheld hiten «Jag kommer».

Albumet er produsert av Christian Walz og gjekk rett inn på fyrsteplass på hitlistene i Sverige. Albumet har også vore inne på Topp 5 på VG-lista i heile 16 veker. 

«Maggios nye skive er eit meisterverk. Ho er meir personleg, syng betre enn nokon gong, og det finst ikkje eitt dårleg eller unødig spor». Det skreiv Dagens Nyheter i si melding etter lanseringa av «Satan i gatan».

Under årets svenske Grammis i februar, var Maggio nominert i heile sju klassar og gjekk heilt til topps i tre; årets pop, årets komponist og årets tekstforfattar.

Billettsalet startar

Sigvard Madsen konstaterer nøgd at den svenske popstjerna verkeleg er i støtet, og trur gladmusikken hennar vil passa perfekt inn på Tysnesfest.

– Me er ute etter å skapa sommarstemning på festivalen. Det trur eg me heilt sikkert vil få med Veronica Maggio og Kim Larsen på torsdagskvelden, seier Madsen.

Han opplyser samstundes at billettane til årets festival vert lagt ut på Billettservice sine nettsider 1. mars. Han røpar også at festivalen den komande veka vil lansera nye artistar og innslag kvar dag.
Følg med på «Tysnes» sine nettsider.