Det er Venelaget for Jåttmuseum som vil sameina muséet og turistinformasjonen. Prosjekt 3012 trekkjer seg frå museumsprosjektet fordi dei meiner venelaget si planlagde satsing er for dårleg.

– Saka om jåttmuseum har teke ei dreining som ikkje er i tråd med Prosjekt 3012 sine opphavlege tankar. Det er vel og bra med venelaget sine moderate planar, men 3012 hadde sett for seg ei langt større satsing. Dette må gjerast meir profesjonelt, sa Bach under Prosjekt 3012-møtet på Haaheim Gaard torsdag.

– Venelaget er tydelegvis komfortabel med å spikra noko opp på veggen i «gamle posten». Det vil ikkje trekkja så mykje folk til Tysnes som tanken til 3012 var. No vert muséet ein vegg i turistinformasjonen sine lokale. Då synest eg det er best «å kopla 3012 i frå», følgde Kjell Brekke opp.

Har skrive avtale

Venelaget for Jåttmuseum hadde møte i slutten av august. Der vart det opplyst at lokale er på plass og at det er skriven ein intensjonsavtale. Avtalen gjev venelaget rett til å ta over lokalet frå april 2010.

Til stades under møtet var leiar i venelaget Hans Ole Dalland, sekretær Kjell Arthur Lunde og ordførar Helge Hauge. Ordføraren fekk opplyst at «det er mykje stoff som kan nyttast til muséet rundt om i bygdene på Tysnes».

I møtet vart det drøfta korleis ein kan sameina muséet, turistinformasjonen og Tysnesfest. Det var semje om at ein lyt arbeida for eit tett samarbeid mellom desse tre om ein skal koma vidare med planane.

– I ein tidleg fase

Leiar i Venelaget for Jåttmuseum, Hans Ole Dalland, fortel at dei er i ein tidleg fase i sitt arbeid for eit jåttmuseum i «gamle posten» i Våge.

– Me er heilt i startfasen, men jobbar utifrå ein plan om eit museum i «gamle posten». Det er dei lokala me får leiga, og vårt arbeid vidare vil vera basert på at det er dei lokala me har til disposisjon, seier Dalland.