– Ved å avslutta Prosjekt 3012 går Tysnes på ein måte to år attende og freistar på nytt å skapa den forankringa som mangla då 3012 vart etablert, utdjupar Sandven som var med i 3012-gruppa.

Takka nei til gåvepakke

Sandven slår fast at to år er for kort tid til eit tiltaksprosjekt, og synest det er synd at 3012 vart avslutta, spesielt når Hordaland fylkeskommune var svært interessert i at prosjektet skulle halda fram.

– Fylket var viljug til å halda fram med prosjektet og bidra med 50 prosent av utgiftene, men Tysnes kommune sa nei. Kommunen vel heller å videreføra ei 30 prosent eigenfinansiert stilling for å ivareta dette området. Differansen vert då 20 prosent for å få ei 100 prosent stilling. Var det riktig av Tysnes kommune å takka nei til ei gåvepakke av ein slik storleik, spør Sandven.

Ho ser for seg at ei vidareføring av prosjektet med ei 100 prosent stilling kunne hatt som hovudoppgåve å utforma ei plattform og ei organisasjonsform for eit utviklingsselskap i tråd med den strategiske næringsanalysen frå i haust.

Vil ta tid

Sandven meiner det absolutt er trong for ei gruppe som jobbar berre med utvikling av Tysnessamfunnet.

Ho har tru på eit utviklingsselskap på sikt, men meiner det vil ta tid å utarbeida eit fundament som næringslivet på Tysnes har felles interesser i og som det er vilje til å gje midlar til.

Ho er samstundes usikker på om næringslivet på øya er klar for å ta det samfunnsansvaret Tysnes har trong for i dag.

– For at eit utviklingsselskap skal gje resultat, bør selskapet ha to-tre personar i 100 prosent stilling, i tråd med tilrådingane i næringsanalysen, meiner Sandven og held fram;

– Selskapet bør i tillegg ha eit langt perspektiv og styret bør vera samfunnsanalytisk og samarbeida med kommunane rundt Tysnes. Styret bør bestå av medlemer både frå Tysnes og utanfor kommunen.

Utfordringane for eit slikt selskap er finansiering, organisering og ei felles plattform.

Sandven meiner arbeidsoppgåvene bør vera kommunikasjon, bustadbygging og marknadsføring av område på Tysnes som skil seg frå kringliggjande kommunar.

– Målet må vera at familiar som vil vekk frå byen, vel Tysnes i staden for andre landlege kommunar.