– Eg er usikker på om det som kjem fram i rapporten skal stå som vår konklusjon. Eg synest det er litt for mykje negativt som kjem fram, mellom anna at gruppa ikkje er nøgd med samarbeidet, utdjupa Hauge.

Eiga oppsummering

Ordføraren fekk støtte frå Torstein Hatlevik (V). Hatlevik meinte formannskapet som styringsgruppe må ha ein eigen prosess og oppsummering av det toårige tiltaksprosjektet.

– Det er ikkje opplese og vedteke det som står i 3012-gruppa sin sluttrapport, la Hatlevik til.

Helge Hauge meinte også at «det bør utarbeidast noko i tillegg til sluttrapporten frå 3012».

– 3012-gruppa sin rapport skal sjølvsagt med, men me bør gjera vår eiga oppsummering, sa Hauge.

Uheldige formuleringar

Rådmann Audun Hovland meinte at det er ein del uheldige formuleringar i sluttrapporten, og at formannskapet bør førebu sine eigne innspel som ei oppsummering av prosjektet.

Lorentz Lunde (KrF) peika på at ein del av formuleringane burde vore annleis, og var samd i at kommunen bør senda ei oppsummering frå si side.

– Ein del av formuleringane er krasse, uheldige og litt opposisjonelle, konstaterte Lunde.

KrF-politikaren understreka samstundes at han meiner det er gjort mykje bra arbeid i prosjektet.

Politikarane gjekk inn for at Audun Hovland, Helge Hauge og Torstein Hatlevik skal utarbeida eit utkast til oppsummering frå formannskapet si side. Saka skal opp att i formannskapet 2. februar.