Miljøfyrtårn er ei konkret miljøsertifiseringsordning for private og offentlege verksemder der målet er å driva lønsamt og miljøvenleg.
Uheldig å stå utanfor

Ordførar Helge Hauge kommenterte i formannskapet at det vil vera ein fordel å vera med. Han fekk støtte frå Torstein Hatlevik (V).

Hatlevik peika på at viss kommunen seier nei, så kan dette resultera i at verksemder vegrar seg for å etablera seg på Tysnes. Dette fordi verksemdene følgjeleg ikkje vil oppnå dei marknadsfordelane som ei slik sertifiseringsordning gjev.

Han fekk støtte frå Lorentz Lunde (KrF).

– Viss det kan blokkera for verksemder, er det uheldig viss me står utanfor. Det er fornuftig å gripa denne sjansen, og me må vera med, sa Lunde.

Vil kosta

Eirik Helgesen (FrP) stilte spørsmål om kor vidt det er lovpålagt å verta ein Miljøfyrtårn-kommune. Han ville også vita om det er sett av pengar til eit slikt tiltak.

– For dette vil kosta, konstaterte Helgesen.

FrP-politikaren fortalde at han har jobba med dette i tjue år og peika på at han veit kva eit slikt tiltak vil krevja av arbeid.

– Me må vita kva me går inn i, understreka han og heldt fram;

– Eg har aldri opplevd at det vert stilt krav til Miljøfyrtårn-sertifisering frå verksemder. Dei går etter ISO-standarden.
Sterk oppmoding

Tore Atle Humlevik (H) var samd med Helgesen i at dette er eit tiltak som vil kosta pengar og krevja mykje arbeid.

– Men må me, så må me. Likevel ser eg på dette som ei typisk motesak, kommenterte Humlevik.

Han fekk støtte frå rådmann Audun Hovland som peika på at eit slikt tiltak vil krevja mykje tid og arbeid, men at det er vanskeleg å vera negativ.

– Å gå inn i ei slik ordning vil føra til ein del byråkratisering. Sånn sett er eg samd med Eirik Helgesen, men samstundes har fylkeskommunen sterkt oppmoda kommunen om å gå inn i dette, sa Hovland.

Vedtaket vart gjort mot FrP si røyst.