– Skiltet med «Tysnesfest» skal plasserast rett oppforbi byggjefeltet. Planen er å hengja skiltet opp mellom flaggstenger, fortel Martin Restad.

60 meter breitt

Skiltet vil få åtte meter høge bokstavar, og heile skiltet vert 60 meter breitt.

– Så litt storleik vert det på det, konstaterer Restad og held fram;

– Me har slite med å koma i media utforbi Tysnes, og tenkjer me må gjera noko som vert lagt merke til også i resten av Hordaland.

Flaggstengene skal takast ned når skiltet ikkje er i bruk.

Formannskapet var positiv til idéen då dei handsama saka i sist møte.

Skal trekkja folk

Planen er å hengja skiltet opp to-tre månader før festivalen. Poenget er at skiltet skal kunna sjåast frå Bjørnefjorden og innseglinga til Våge.

– Når båtfolket kjem forbi og lurer på om dei skal leggja til på Os eller Tysnes, får me vona at skiltet kan vera med å trekkja merksemda mot Våge, seier Restad.

Han vonar Bergens Tidende og andre aviser snappar opp stuntet slik at ein på den måten får marknadsført festivalen og kommunen.

– Tysnesfest har vorte så stor at me må freista å dra publikum frå heile regionen. Då er marknadsføring heilt avgjerande, påpeikar Restad.
Han røpar samstundes at festivalen har fleire andre stunt på gang.