Hovland har tilbode seg å jobba inntil 36 prosent for kommunen etter at han går av med pensjon til hausten. Formannskapet drøfta saka tysdag, og sa seg positiv til ei «retrettstilling» for den noverande rådmannen.

Føresetnaden er at det er ledige heimlar ved rådmannskontoret i tilsvarande storleik som deltidsstillinga. FrP røysta imot.

Bruk for kompetansen

Ordførar Helge Hauge meinte kommunen har god bruk for Hovland sin kompetanse, og at det er nok av oppgåver han kan ta fatt på.

– Det er diverre mange oppgåver me ikkje har ressursar til i dag, som kan verta løyste gjennom ei slik deltidsstilling, sa Hauge.

Han understreka at det er ein føresetnad at det er ledige heimlar ved rådmannskontoret.

Ingrid Tysnes Stue (Ap) meinte at dette er ei viktig seniorpolitisk sak, og at politikarane har eit ansvar i så måte.

– Me har heilt klart bruk for kunnskapen og kompetansen til Hovland. Men det er viktig at det er ledige heimlar, sa Stue.

– Heilt feil signal

Magne Fauskanger (FrP) meinte ei slik tilsetjing vil gje ein heilt feil signaleffekt, og peika på at ei slik deltidsstilling ikkje er inne i budsjettet.

– Økonomisjefen var i formannskapet i sist møte og gav ei dyster framstilling av den økonomiske situasjonen i åra som kjem. Då vert det heilt feil om me skal gje eit tilbod om jobb til ein som har sagt seg opp. Eg opplever ikkje dette tilbodet som eit tilbod me ikkje kan seia nei til. Å betala 260.000 kroner i året for at han skal jobba to dagar i veka, vert heilt feil, sa Fauskanger.

Helge Hauge kommenterte at rådmannskontoret vart redusert med ei 100 prosent stilling i 2009, og at det er ein ledig stillingsheimel der.

– Eineståande tilbod

KrF-politikar Aud Kaldefoss meinte kommunen har fått eit eineståande tilbod ved at Hovland har sagt seg viljug til å jobba deltid etter at han går av.

– Me har bruk for kompetansen til Hovland og finn heilt sikkert oppgåver til han, sa Kaldefoss.

Tore Atle Humlevik (H) var ikkje like eintydig, og ville ikkje nytta uttrykket «eineståande tilbod».

– Dette er både og. Me har bruk for kompetansen hans, men må vakta oss vel for ikkje å oppretta nye heimlar, sa Humlevik.

Han la samstundes til at han hadde fått litt kommentarar til saka på at ein «syt for seg sjølv i kommunen».

– Me skal heva oss over slike kommentarar, men det er viktig at rådmannen går inn i ledige heimlar, understreka Høgre-politikaren.