Venstre, Høgre og Framstegspartiet la i førre formannskap fram forslag om å byggja ny sjukeheim på ny tomt. Forslaget fekk ikkje fleirtal i formannskapet. Men det er kommunestyret som gjer vedtak i saka, og der ligg det an til fleirtal for framlegget frå dei tre partia.

12-9

Venstre, Høgre og Framstegspartiet har til saman 10 representantar i kommunestyret. I tillegg gjekk Tverrpolitisk til val på ny sjukeheim. Dei har to representantar i kommunestyret. Dermed ligg det an til tolv mot ni røyster for ny sjukeheim på ny tomt når saka skal handsamast 23. februar.

– Heilt sikker kan ein likevel ikkje vera før røystinga er over, understrekar leiar i Tysnes Venstre Torstein Hatlevik.

Han er derimot ikkje i tvil om at ny sjukeheim på ny tomt er det beste alternativet for Tysnes.

– Me må byggja ei varig og framtidsretta løysing, seier Hatlevik.

Han legg til at eit slikt alternativ vil gjera at ein slepp ein svært krevjande byggjeperiode.

– Ei rehabilitering over to år vil gje store utfordringar for dei buande og dei tilsette, påpeikar Hatlevik.

Gjekk til val på ny

FrP og Høgre gjekk til val på ny sjukeheim. FrP-politikar Eirik Helgesen er klar på at ny sjukeheim er det mest framtidsretta. Han meiner kommunen ikkje er tent «med å lappa på den gamle».

– Me må ta omsyn til dei buande og tilsette, og byggja ein sjukeheim som er attraktiv både som buplass og arbeidsplass. Me må også ta høgde for nye føreskrifter, krav og lover som me veit vil koma frå regjeringa, til dømes samhandlingsreforma, seier Helgesen.

Tore Atle Humlevik (H) understrekar at ein står langt friare i utforminga av sjukeheimen viss ein vel å byggja nytt.

– Me må tenkja framtidsretta når me skal velja løysing, seier Humlevik.

– Kjem ikkje til å velta lasset

Torstein Hatlevik vedgår at det kan vera grunn til å vera uroa for den økonomiske situasjonen i kommunen i åra som kjem. Men investering i ny sjukeheim kjem ikkje til å velta lasset, slik Hatlevik ser det.

– Medrekna alle statlege tilskot vil skilnaden i pris på ny sjukeheim og alternativet med å erstatta delar av den eksisterande sjukeheimen, vera på fem millionar kroner. Det er ikkje 400-500.000 kroner i renteutgifter i året som vil velta lasset. Å erstatta delar av den noverande bygningen er minst like usikkert økonomisk, og langt mindre framtidsretta, kommenterer Hatlevik og held fram;

– Skulle det hatt ein reell innverknad på kommuneøkonomien, måtte me gått for å berre flikka på den eksisterande bygningsmassen. Men det er me alle samde om at ikkje er ei god løysing.

Han får støtte frå Tore Atle Humlevik og Eirik Helgesen.

– Fem millionar kroner fordelt utover 30 år er småpengar i denne samanhengen, meiner Humlevik.