– Kommunen vil ikkje vurdera andre tomter, og fylkesmannen vil ikkje møta kommunen før me har vurdert ei anna plassering enn Gjerstad. Då står me der då, konstaterer Stue.

Manglar barnehageplassar

Stue peikar på at kommunen manglar barnehageplassar, og at den nye barnehagen var ei hastesak då ho vart handsama i dei politiske utvala.

– No i ettertid har me ikkje høyrt eitt ord om at det hastar, legg ho til.

Ap vurderer no kor vidt dei skal koma med forslag om å ta opp att saka.

KrF deler Ap sitt syn på saka. Aud Kaldefoss meiner også at plasseringa no må revurderast.

– Når det dreg sånn ut i tid, meiner eg det bør vurderast kor vidt ein skal sjå på andre alternativ. Dette var jo så til dei grader ei hastesak då ho vart handsama, minnar Kaldefoss om.

Ho peikar på at hennar parti heile tida har meint at Reiso er den beste plasseringa for ein ny barnehage.

– Me respekterer fleirtalet for Gjerstad, og KrF kjem ikkje til å ta opp att saka. Men eg synest at dei som har gått inn for Gjerstad bør opna for ei revurdering når ein no ser at dette dreg slik ut i tid, seier Kaldefoss.

Pressa administrasjon

Torstein Hatlevik (V) meiner kommunen framleis må jobba for å få til barnehage på Gjerstad.

– Men har det ikkje skjedd noko på Gjerstad på eit par månader, så får me heller drøfta korleis me skal angripa saka vidare. Det må i så fall skje når det er hundre prosent sikkert at dagens vedtak ikkje let seg gjennomføra, meiner Hatlevik.

Han legg til at kommuneadministrasjonen allereie er pressa, og Venstre-leiaren meiner det vert feil å påleggja administrasjonen ei ny utgreiing kring barnehagen.

– Kommunen har mange andre store prosjekt på gang, påpeikar Hatlevik.

Gjerstad er det einaste rette

Torstein Hatlevik får støtte frå Magne Fauskanger (FrP). Fauskanger meiner Gjerstad er det einaste rette.

– Gjerstad er den beste plasseringa. Det er ingen grunn til å byrja å bala med eit anna alternativ før det eventuelt skulle visa seg at det ikkje let seg gjera, kommenterer FrP-politikaren.

Tore Atle Humlevik og Høgre har ikkje drøfta kor vidt ein bør sjå på andre alternative plaseringar.

– Me held oss til vedtaket om ny barnehage på Gjerstad, og har ikkje drøfta dette internt i partiet, kommenterer Humlevik.