FrP meiner tiltaket må vera ein sentral del av kommunen sin miljøplan, og peikar på at ei digitalisering av sakshandsaminga vil gje ein monaleg miljøgevinst og spara kommunen for utgifter.

– Når dei andre politikarane i koalisjonen no har bestemt at Tysnes skal verta ein Miljøfyrtårnkommune, antar me at ei slik digitalisering av det politiske arbeidet står føre ei rask innføring, påpeikar Eirik Helgesen i eit lesarbrev førre veke.

Papirlaust byråd

Byrådet i Bergen er papirlaust. Alle saksdokument føreligg digitalt. All sakshandsaming skjer via PC. No skal også bystyrepolitikarane i Bergen verta papirlause. Papirdokumenta vert erstatta ved at kvar politikar får sin eigen PC. På datamaskina skal dei både lesa dokument og skriva notat.

FrP fremja saka i kommunestyret i Tysnes fyrste gong i desember 2003. Bakgrunnen var å spara pengar og utnytta tekniske løysingar til å forenkla arbeidet.

– Me har fremja saka fleire gonger sidan den gong, men har vorte nedstemt kvar gong, hevdar Helgesen.

Så langt har kommunen mangla utstyret til ei slik digitalisering, men dette er i endring.

Ny scanner

Assisterande rådmann Steinar Dalland opplyser at kommunen i desse dagar held på med ei oppgradering av datasystema. Endringa opnar for ei digitalisering av sakspapira.

– Når dei nye tekniske løysingane er på plass, er det naturleg at kommunen tek ei vurdering på kor vidt ein skal føreta ei digitalisering av politikarane og sakshandsaminga, kommenterer Dalland.

Kommunen skal kjøpa ny scanner og satsar på å vera i gang med scanning av innkomande post før påske. Dei oppgraderer også sakshandsamingssystema for sakspapir og e-post.

– Når systemet er oppgradert, vil det vera teknisk mogleg med ei digitalisering. Men det er ikkje nok at kommunen har eit digitalisert arkiv. Ein må også syta for at politikarane og andre har høve til å motta digital post, minnar Dalland om.

Assisterande rådmann konstaterer at ei digitalisering kan gje ein miljøgevinst, medan den økonomiske gevinsten er noko meir usikker.

– Digitalisering fører til eit ikkje uvesentleg meirarbeid for sekretariata og det er også utgifter knytt til drift av datamaskiner, system og eventuelle maskiner for politikarane, så eg vil ikkje einsidig konkludera med at det er ein økonomisk gevinst her. Det må reknast på.