Saka om ny barnehage på Gjerstad har stått i stampe. Fylket har sagt at dei ikkje ynskjer fleire møte med kommunen før kommunen har greidd ut andre alternativ.

No har administrasjonen i kommunen sett på saka, og arkitektkontoret ABO har utarbeidd eit utkast til ei såkalla moglegheitsskisse.

Konstituert teknisk sjef Arne Johan Johnsen la fram utkastet for formannskapet tysdag.

Plass til kulturskulen

Johnsen presiserer at saka berre er på drøftingsstadiet og at skissa som vart lagd fram for politikarane berre er eit fyrste utkast frå arkitektkontoret.

– Men det som er jobba fram til no, ser lovande ut konstruksjons- og arealmessig, kommenterer Johnsen.

Den førebelse skissa viser ein fem avdelings barnehage plassert der gymsalen på Tysnes skule ligg i dag, mellom skulebygget og symjebassenget. Gymsalen har vore lite brukt etter at Tysneshallen vart bygd, og denne og resten av arealet mellom skulen og symjebassenget vert rive viss ein går for denne løysinga.

Skissa omfattar eit nytt barnehagebygg over to etasjar. I eine etasjen finn ein fem barnehagebasar, ein «kultursal» med amfi, fellesrom, rom til kulturskulen, kjøken og lager, toalett og stellerom.

I den andre etasjen er det teikna inn øvingslokale for kulturskulen, kontor og personalrom. Det er også teikna inn nytt garderobeanlegg i tilknyting til symjebassenget. Skulebygget og symjebassenget er tenkt bunden saman med ein korridor som også gjev høve for rullestolbrukarar å koma seg frå skulebygget til symjebassenget.

Barnehagen sitt areal vert på 850 kvadratmeter.

Spenstige planar

– Det er spenstige planar som er skissert. Ei slik løysing vil løysa mange av problemstillingane som har vore reist, konstaterer Arne Johan Johnsen og held fram;

– Arealet er allereie utbygd og såleis klarert. Det er ikkje noko opphavleg land att. Konstruksjons- og planmessig let dette seg realisera, og det kan realiserast relativt kjapt.

Han understrekar samstundes at politikarane og fagetaten må ta stilling til ei slik løysing før ein avgjer kor vidt dette er eit alternativ ein skal spela inn til fylket.

– Me er framleis berre på drøftingsstadiet. Men det er ikkje til å stikka under ein stol at denne løysinga så langt ser ut til å tilfredsstilla areal- og planmessige krav.

ABO jobbar no vidare med «moglegheitsskissa» og skal mellom anna sjå på høva for å utvida barnehagen på sikt.

Ordførar Helge Hauge konstaterte i formannskapet at det hastar med å få på plass ein ny barnehage, og uttalte at ein er nøydd til å freista å ha ny barnehage på plass til neste haust.