I dag var det ”berre 63 kampar” som skulle spelast, så alle kampane kunne avviklast på grasbanen på Reiso. Fyrste avspark var klokka ni i dag tidleg, og etter det gjekk det slag i slag fram til klokka var åtte på kvelden. Kampane i dag var dei siste innleiande kampane, og i morgon er det sluttspela i dei ulike klassane som skal spelast. I år er det er mogeleg å stilla med lag i klassane lettbeinte menn og damer, sårbeinte menn og damer, og stivbeinte menn. Sluttspela startar på Reiso i morgon klokka tolv, og held fram til halv seks.

Artig med cup
Kristin Skorpen (10) nytta høvet til å sparka litt fotball på sidelina mellom kampane. Ho kan fortelja at ho ikkje speler sjølv, men at ho heller ser på andre. - Eg skal vera her i dag og i morgon. I morgon skal eg sjå på når mamma spelar i finalen, smiler ho. Vidare meddeler ho at ho tykkjer det er artig å vera på cup. Kristin set også pris på det fine vêret, sjølv om det til tider nesten kan bli litt for mykje av det gode. Men no skal det spelast. Ikkje på bane, og ikkje kamp, men det ser ikkje ut til å bry Kristin Skorpen der ho smilande sparkar ball med venene.

Resultatliste for innleiande kampar 3. juni.