Cupen i Tysneshallen, som er i dag og i morgon, har 23 påmelde lag. I fjor var det heile 30 lag som var med på Kraftlagscupen. Frå klokka halv eitt til klokka fem i dag var det sett opp kampar kvart femtande minutt, og det vart spelt 18 kampar utover dagen. I morgon skal det fyrst på dagen spelast innleiande kampar. På ettermiddagen er det sluttspela sin tur. I samband med avviklinga av finalane vert det premieutdeling etter kvar finalekamp i klasse 1, 2, 3 og 5.
Nøgd toppscorar
Kristoffer Lie Hansen er ein av spelarane på Dei Krakilske Kosmo – Kosakkane, også kjende som KKK. Han og laget leverte ein flott innsats i kampane i dag, og sikra seg såleis fyrsteplassen i puljen. Dette gjorde dei med siger mot Spretne Bein og uavgjord mot Deaf Boys.
- Me vann nettopp puljen, smiler den unge fotballspelaren etter at dommaren bles av kampen mot Deaf Boys. Han tykkjer ting har fungert bra for laget i dei innleiande kampane, og er godt nøgd med siger i puljen. No er han og lagkameratane klare for det morgondagen vil bringa.
- Du kjem vel for å dekkja i morgon også. Då skal me løfta pokalen, skyt lagleiar Johan Løve Gjersvik inn med eit smil etter at Kristoffer har fullført setninga. Det er tydeleg at det ikkje er ambisjonane det skal stå på for karane i KKK.