Konferansieren for kvelden var Lorentz Lunde. Han leia basaren til ende med humor. Musikkinnslaget var Eirik Hodneland (8) som spelte gitar og song med far sin som komp. Eirik som tidlegare vann Tysnessjansen leverte to låtar før det var trampeklapp i salen. I år var det ein litt ny vri i forhold til kva det har vore dei tidlegare åra. I staden for tale, fekk dei oppmøtte i år få sjå biletshow frå Lena Helvik (16) sine bilete.
Catrine S. Moss (17) var blant publikum i salen, og vart imponert over båe dei unge talenta.
– Dei er jo heilt utrulege, smiler ho. Sjølv med god mat og to rundar med åresal, er det likevel det å treffa att folk som gjer basaren i påska så kjekk.
– No får me sett mange av dei som flyttar vekk frå bygda, og i tillegg kjem alle hyttefolka heim. Det er fleire av desse eg hugsar eg leika med då eg var mindre, fortel Catrine. Då siste loddtrekninga vart gjort, annonserte Lorentz kor mykje som hadde kome inn. Alle pengane går til Lunde idrettslag, som står sterkt med både Vassbakken og saman med Bygdalaget om Ballbingen i Lunde.