Nytt Tysnesfest-slepp

Kristiansand-gruppa car.pool er Vestlandssatsinga 2020, og skal dermed spela på ei rekkje festivalar i sommar, deriblant Tysnesfest.

– Car.pool er ein herleg eksplosjon av 80-tals pop og moderne rock. Best servert live. For denne gjengen må ikkje berre høyrast, den må dansast med, skriv dagleg leiar i Tysnesfest, Øystein Vaage i ei pressemelding fredag.

Det er musikkfestivalen 100 Dagar på Stord som kvart år kårar bandet eller artisten som blir Vestlandssatsinga. I år var det gruppa car.pool frå Kristiansand som gjekk heilt til topps, og dei kan dermed venta seg ein travel sommar med konserter på 13 ulike festivalar, mellom anna Malakoff, Utkant, Skåne Bluesfestival og Festidalen, i tillegg til at dei sjølvsagt kjem til Tysnesfest.

Car.pool går inn i laurdags-programmet på Gjerstad under Tysnesfest. Det er same kveld som TIX toppar plakaten. Andre artistar som er klare for Tysnesfest 2020 er blant anna Hjerteslag, Vinskvetten, Highasakite, CC Cowboys og Hellbillies.

Øyvind Bjerkestrand oyvind@tysnesbladet.no