«Tirsdagsfeiden» på ein torsdag

Sommaren er ikkje heilt over for golfarane på Dalen enno, og sist torsdag spelte dei tolvte runde av «tirsdagsfeiden» i fantastisk vêr. Den populære konkurransen blei flytta frå tysdag til torsdag sist veke på grunn av mykje regn på tysdagen. Tretten personar stilte til start i «sydenvarmen» på torsdagen, fordelt på seks lag.

– Me spelte vår populære eigenlaga parspel-variant med seks hol golf scramble, seks hol pitch & putt scramble og seks hol putting, informerer golfklubben på Facebook.

Beste lag, netto slag, vart Helge Liland og Arne Dalsgård, med det som blir skildra som godt spel gjennom heile runden.

Det står att berre to rundar av den populære «tirsdagsfeiden» for i år, og klubben opplyser på Facebook-sida si at desse kjem til å bli spelt når det passar for den enkelte. Dette på grunn av stadig skiftande nedbørs- og vêrmeldingar. Fristen for å fullføra begge rundane er 22. september.

Runde 13 er golf over 9 hol, frontnine, medan runde 14 er pitch & putt, 18 hol.

Golfklubben opplyser at minst to personar må gå saman, og at også dei to siste rundane blir spelte med ballplassering og maks fem slag over par.