20 i karantene etter smittetilfellet tysdag kveld

Før helga fekk to personar frå Tysnes påvist korona, tysdag kveld fekk ytterlegare ein person frå Tysnes påvist smitte. Det siste smittetilfellet er så langt det fjerde tilfellet på Tysnes totalt sett.

Ordførar Kåre Martin Kleppe opplyser at den siste personen er blitt smitta på Stord. Han kan ikkje seia noko om alder og kjønn.

– Vedkomande skal vera tilknytta situasjonen som er på Stord. Personen er ikkje blitt smitta på Tysnes, seier ordføraren til «Tysnes» onsdag ettermiddag.

– Ut frå det som er kjent til no, skal det ikkje vera noko smitteoppblomstring på Tysnes, legg han til.

Tysnes kommune har drive med smittesporing utover heile onsdagen. Då «Tysnes» snakka med ordføraren onsdag ettermiddag, var ein enno ikkje heilt ferdige med smittesporinga.

– Alle nærkontaktar er blitt kontakta, det gjeld familiemedlemer til vedkomande og andre som har opphalde seg nærare enn to meter i meir enn 15 minutt dei siste dagane, seier han.

Om lag 20 personar var sett i karantene onsdag ettermiddag. Det gjeld familiemedlemer og nokre kollegaer til vedkomande.

– Alle som er i karantene blir oppmoda om å testa seg, seier ordføraren.

Tysdag kveld opplyste ordføraren til avisa at det siste tilfellet ikkje ser ut til å ha noko samanheng med dei to tilfella frå fredag.

– Ta ansvar sjølv

Ordføraren oppmodar folk om å følgja reglar og retningsliner, vera nøye med avstand, og vaska seg og sprita seg. Han meiner at det ikkje er grunn til å uroa seg.

– Slik det ser ut no, er dette enkelttilfelle, og ikkje lokal oppblomstring, seier han, og legg til:

– Ta ansvar sjølv. Det er det viktigaste for å verna seg mot smitte. Viss ein har vore i nærkontakt med smitta personar, vil ein bli kontakta.

Dette er nærkontaktar:

• Dei som bur i same husstand.

• Dei som har hatt fysisk nærkontakt som i ein husstand, til dømes nære kollegaer i kontorfellesskap.

• Har pleia den som er bekrefta smitta eller hatt nær fysisk kontakt, utan å ha brukt anbefalt smittevernutstyr.