Aarvik Gard kan bli kåra til årets gardsbutikk
Publisert
Sist oppdatert
Aarvik Gard på Baldersheim i Fusa er blant dei ti gardsbutikkane som har fått flest nominasjonar i kåringa «Norges beste gårdsutsalg».
Det opplyser innehavaren av garden i eit innlegg på Facebook, etter å ha fått melding frå arrangøren HANEN. Agneta Linden Moen frå HANEN stadfestar til avisa at det stemmer.
Annonse
– Dei har jobba godt med å sanka stemmer i sommar, og det er positivt, seier ho.
Også Myrvold Gård på Huglo og Myrdal Gard på Tysnes er med i konkurransen, men har ikkje sanka like mange stemmer som Aarvik Gard.
– Dei er begge fine medlemsbedrifter og representerer bygdeturisme på ein strålande måte, poengterer Linden Moen.
Det er framleis mogleg å nominera sin favoritt fram til 1. august.
Annonse
Dei tre gardsbutikkane med flest stemmer går vidare til finalen. I finalen skal ein uavhengig jury mellom anna vurdera vareutval, kvalitet, lokal forankring, vertskap, atmosfære og innovasjon.
Kåringa skal løfta fram gardsutsal som tilbyr eigenproduserte varer, lokalmat og gode opplevingar for dei besøkjande.
– Me er heilt rørte over kor mange som heiar på oss, og me er så audmjuke og takksame for at de vil komma på besøk til Aarvik Gard, skriv Fru Aarvik, eller Ranjeeta Aarvik, på Facebook.
