Båt gjekk ned - to personar er redda

Ein båt gjekk ned vest for Store Godøya klokka 08.20 tysdag morgon.

Alle naudetatar blei varsla då ein leppefiskebåt med to personar om bord kantra i Bjørnafjorden i morgontimane.

– Det kom inn naudmelding frå båten, samt via politiet, og alle naudetatar blei tilkalla, opplyser Ståle Jamtli, redningsinspektør i Hovedredningssentralen, til «Tysnes».

Både luftambulanse, ambulansebåt, redningsskøyte og ambulanse blei tilkalla. Redningsaksjonen skjedde i området kring Vesøyane, vest for Store Godøya. MF «Kommandøren» skal òg ha vore involvert i redninga.

Dei to personane sat på kjølen på båten då ein kringliggjande båt som hadde oppfatta naudsignalet deira kom til for å hjelpa. Båten kom så raskt til at naudressursane blei kalla tilbake.

– Dei fekk hjelp etter ti minutt av båten som kom til, fortel Jamtli.

Då den private båten kom til staden, gjekk båten heilt ned, og dei to hamna i sjøen rett før båten redda dei opp av vatnet.

– Dei blei plukka opp, og tatt med inn til land og køyrt til legevakta, opplyser Jamtli.

– Det var ingen fare med dei. Dei var i fin form, men litt kalde etter å ha vore i vatnet, avsluttar han.