Ber folk halda seg heime
Regjeringa gjekk i dag ut med nye nasjonale innstrammingar.
Beskjeden frå Erna Solberg under dagens pressekonferanse er å avgrensa sosial kontakt med andre mest mogeleg, slik at ein kan snu utviklinga i smittetala.
– Hald dykk mest mogeleg heime. Ha minst mogeleg sosial kontakt med andre, seier Solberg.
Artikkelen held fram under annonsen.
Ein kan ha maksimalt fem personar heime hjå seg, og kun ved spesielle høve. Vidare er rådet å halda minst to meter avstand til personar i risikogrupper.
Vidare grep er at skjenkestader ikkje får sleppa inn folk etter klokka 22, og nasjonal skjenkestopp ved midnatt. Tiltaket gjeld frå natt til laurdag.
Det er innført krav om attest på gjennomført koronatest ved innreise frå raude land, og har ein ikkje fast bustad eller arbeidsgivar, er det både krav om å gjennomføra koronatest, og å opphalda seg på koronahotell i inntil ti dagar.
På trass av oppmodinga om å halda seg mest mogeleg heime framover, og å samla maksimalt fem personar samtidig, er det lov å samla inntil 20 personar på private arrangement på offentleg stad, og inntil 50 på innandørs arrangement utan fastmonterte seter. Det er òg lov å vera inntil 200 personar på arrangement der alle seter er fastmonterte.
