Reiseselskapet TUI har spurt nordmenn om kva dei synest er mest irriterande når dei er om bord i eit fly. Éin ting skil seg klart ut, og det er når ein medpassasjer sparkar i stolryggen. Over halvparten, 53 prosent, svarar at dette er det mest irriterande.
– Det er som regel barn som står for sparkinga. Viss det skjer med meg, pleier eg å snakka fint med foreldra. Seier ein ifrå på ein hyggeleg måte, kjem ein langt, seier kommunikasjonssjef i TUI Norge, Anne Mørk-Løwengreen.
Annonse
På andreplass kjem ein «uvane» som kan vera litt vanskelegare å gjera noko med. 41 prosent meiner at medpassasjerar som drikk for mykje alkohol er det mest irriterande.
– Det er jo veldig individuelt kva folk meiner er «for mykje», men å drikka seg overstadig rusa er strengt forbode. Det handlar om tryggleiken, og då risikerer du å bli kasta av flyet, seier Mørk-Løwengreen.
Andre ting folk irriterer seg over er hosting utan å dekka til munnen (28 prosent), mobilbruk utan hovudtelefonar/øyrepluggar (23 prosent), nagleklipping eller filing (20 prosent) og passasjerar som tar av seg sokkane (19 prosent).
