Fleire tre i vegen

Karianne Dalland Nesse og mannen var på veg til Våge for å henta dottera fredag kveld då dei møtte på eit stort tre som låg i vegen ved Leite, like før Kleppakrysset. Dei måtte snu og køyra heim igjen, då det ikkje var passasje på staden. Heime på Øvrebø har dei også mista straumen.

– Eg vil tilrå folk å halda seg inne i kveld. Fyra i omnen, tenna stearinlys og fram med Ludobrettet, seier ho.

Dottera fekk husvære i Våge over natta.

Også langs Fjellvegen mellom Uggdal og Onarheim, i Osbrekko, ligg det eit tre i vegen, opplyser ein meldar til «Tysnes» kort tid etter klokka 22 fredag kveld.

Ifølgje BKK sitt straumkart blei det meldt om eit straumbrot frå Høviskelandslio til Nesse klokka 20.58 fredag kveld, truleg som ei følgje av stormen «Amy». Det var eit straumbrot på same staden tidlegare i eitt-tida fredag, men dette blei ordna raskt. Ifølgje BKK er det andre straumbrotet venta å vera løyst innan midnatt.

Har stormen fått konsekvensar for deg? Tips oss gjerne på 48205660.