Førjulsgåve frå Tysnesfest

Først ut i pressemeldinga frå festivalen er ingen ringare enn det britiske bandet Smokie. Og om du no høyrer songen «Living Next Door to Alice» i hovudet, så har du heilt rett. Men Smokie har fleire kjente låtar, noko som ikkje er overraskande når dei har halde det gåande sidan midten av 1960-talet. Dog med berre eitt av dei originale bandmedlemmane att.

Trass i alderen – Smokie skal turnera over heile Europa på «The Legacy Tour» i året som kjem, og der står altså Tysnesfest på lista over plassar ein kan få med seg ikona.

Smokie er det bandet som har lege lengst på VG-lista, berre slått av The Beatles. Bandet er no på sin fjerde vokalist, og har sidan 2021 vore leia av Pete Lincoln.

Popkometen RABO

Deretter følgjer tre norske stjerneskot: RABO, May og Bare Andy.

Live Rabo Lund-Roland, med artistnamnet RABO, blir skildra som ein «popkomet» av Tysnesfest. Ifølgje festivalen har RABO raskt blitt ein av dei mest spennande nye artistane i landet, og det er ikkje vanskeleg å sjå kvifor:

Ho blei signert som den første låtskrivaren utanfor Nord-Amerika til Disney Music Publishing, har skrive for K-pop-stjernene Aespa og jobba i USA med nokre av verdas største produsentar. Debutsingelen «Talk To Me» gjekk rett inn på 2. plass på norske radiolister, og ho har allereie spelt på Trondheim Calling, Omeara i London og The Great Escape.

– Med store trommer, drivande gitarar og ein stemm som treff, blir dette ein av dei mest moderne, energiske konsertane på Tysnesfest, heiter det i pressemeldinga.

Imponerer på TikTok

Også 21 år gamle Margrethe Frich, under artistnamnet May, er ei framstormande og mykje omtala popstjerne her i landet. Ho har vore «Månedens Urørt», hatt fleire hitar, gått viralt på TikTok og herja på Spotify-listene med superhiten «Galopp», som gjekk heilt opp til 6. plass på topp 50 i Noreg. Ho har skrive låtar for store norske artistar som Chris Holsten, Emma Steinbakken og Alessandra, og imponert verdsstjerner som Sabrina Carpenter og Tate McRae med tolkingane sine av låtane deira på TikTok.

– Musikken hennar er full av leikne melodiar og sommarleg pop – perfekt for ein varm festivalkveld, skriv festivalen vidare i pressemeldinga.

Røter frå Tysnes

Sist, men ikkje minst, kjem songaren Bare Andy til Tysnesfest 2026. Han er kanskje ikkje den mest kjente artisten enno, men passar utan tvil til musikkprofilen til festivalen: Han leverer nemleg norsk country/folk/pop med humor, varme og høg allsongfaktor.

I tillegg er han godt på veg til å bli kjent for eit norsk publikum svolten på artistar i same stil som Tobias Sten, noko som blei tydeleg då han laga ein norsk versjon av Shaboozey-songen «A Bar Song (Tipsy)» og songen fekk over 100.000 avspelingar på TikTok den første veka. I skrivande stund har songen («En barsang (A Bar Song)») over 217.000 avspelingar på Spotify.

Bare Andy har allereie spelt på store scener, blant anna hovudscena på Countryfestivalen i Seljord. No ser han vestover og gler seg til neste sommar:

– Eg er megagira på å spela på Tysnesfest! Eg har slekt frå Uren Luren og har feriert i Teigen/Årbakka kvar sommar sidan eg blei fødd – heilt magisk og skikkeleg full circle moment! skriv artisten sjølv, ifølgje pressemeldinga.